MESSK hein IESPP-sira aprezenta lista estudante-sira nian
DILI, 11 maiu 2021 (TATOLI) – Ministru Ensinu Superiór Siénsia no Kultura (MESSK) Longuinhos dos Santos, hein Instituisaun Ensinu Superiór Públiku no Privadu (IESPP)-sira to’o kinta (13/05), atu hatama lista estudante-sira nian, nune’e MESSK bele prosesa ona subsídiu pulsa internet no izensaun propina.
Notísia Relevante : MEJD sei apoiu pulsa internet ba estudante ensinu báziku no sekundáriu-sira
“Ha’u fó ona tempu ikus ba IESPP sira to’o de’it kinta (13/05), atu hatama lalais lista estudante-sira nian, inklui númeru rejistu no mós númeru telefone estudante-sira nian, nune’e ami bele prosesa apoiu subsídiu ba estudante-sira,” Ministru Longuinhos dos Santos, informa ba jornalista-sira hafoin audiénsia ho Primeiru-Ministru (PM), Taur Matan Ruak, iha rezidénsia Estadu, Faról, Dili, tersa ne’e.
Ministru Longuinhos hateten, daudaun subsídiu kona-ba izensaun propina no internet iha hela prosesu. Maibé Ministériu iha obrigasaun hakerek nafatin karta ba Ministériu Finansas atu konfirma kona-ba montante total orsamentu ba medida ne’e iha no nia justifikasaun, nune’e Ministériu bele akumula fali dadus estudante-sira nian hodi haruka fali bá finansas atu hetan pagamentu.
Governante ne’e akresenta katak izensaun propina estudante-sira nian Ministériu mak sei selu direita bá Universidade sira, katak kada estudante sei hetan $150 kada semestre, agora bá liña internet kada estudante sei hetan pulsa $10.00 ba fulan ida ne’ebé Ministériu sei apoiu ba fulan tolu.
Jornalista : Tomé Amado
Editór : Francisco Simões
