Fatin akontese fenómenu naturál foin lalais, iha área área Raisut-Raitahu, suku Uma uain-kraik, munisípiu Viqueque. Imajen/IPG

DILI, 11 maiu 2021 (TATOLI)—Institutu Petróleu no Jeolójia, Institutu Públiku (IPG, I.P, sigla portugés) hahú halo estudu sientífiku ba fenómenu naturál iha área Raisut-Raitahu, suku Uma-uain kraik, munisípiu Viqueque no foti ona amostra atu halo teste iha laborátoriu.

Fenómenu naturál ne’e akontese iha segunda (03/05), maizumenus tuku 02:00 madrugada ho distánsia kilómetru 30 hosi komunidade sira nia hela fatin.

Notísia relevante: IPG husu komunidade hapara atividade besik área vulkániku iha Viqueque

Ekipa IPG halo ona estudu sientífiku preliminár liuhosi halo observasaun no verifikasaun direta ba lokál akontese fenómenu erupsaun mud vulcano ne’ebé asosia ho gás iha área refere.

Ekipa IPG rekolla materiál amostra hafoin akontese fenómenu naturál foin lalais, iha área área Raisut-Raitahu, suku Uma uain-kraik, munisípiu Viqueque. Imajen/IPG

Iha ámbitu  observasaun, ekipa mós kolleta amostra hirak mak hanesan tahu no fragmentu  fatuk ka materiál ne’ebé prodús hosi eventu erupsaun mud vulcan.

“Hosi analiza laboratóriu rasik bele hatene estratigrafia (idade fatuk no formasaun). Dadus ne’e rasik sei halo mós komparasaun ho dadus jeofízika liga ba profunidade,” refere nota ne’ebé Agência TATOLI asesu, tersa ne’e.

Aleinde ne’e, ekipa mós halo survey iha rai leten hodi hatene kontrolu jeolojia iha área besik fatin akontesimentu fenómenu erupsaun ne’e.

Nune’e mós, ekipa IPG mós uza kámara drone ho tipu Phantom 4 RTK DJI hodi bele akapta imajen no vídeo hosi aéreu ho aparelu, hodi hatene liután impatu hosi erupsaun mud vulcano nia atividade ba área refere inklui bele hatene radius estragu hosi fenómenu naturál ne’e.

Ekipa estudu sientífiku preliminár hosi IPG ne’e, dirije direta hosi Prezidente IPG, Gabriel Aparício, Vise-Prezidente IPG, Oktoviano Viegas Tilman, no akompaña hosi Xefe ekipa estratigrafia, Isaias Barros ne’ebé hanesan jeolojista, hosi ekipa kartografia, Jose Nano hamutuk ho ekipa hosi Ministériu Petróleu no Minerál (MPM), Cleto Soares.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here