Mapa Viqueque. Imajen/wiki

DILI, 04 maiu abríl 2021 (TATOLI)-Institutu Petróleu no Jeolojia (IPG, sigla portugés) husu ba komunidade iha área Raitahu, suku Uma wain kraik, postu administrativu Viqueque villa, munisípiu Viqueque, atu labele hala’o atividade besik área fenómenu erupsaun vulkániku.

Fenómenu naturál ne’e akontese iha segunda (03/05), maizumenus tuku 02:00 madrugada ho distánsia kilómetru 30 hosi komunidade sira nia hela fatin.

Prezidente IPG, Gabriel Aparício, husu ba komunidade atu mantein kalma, lalika pániku no hapara lai atividade sira ne’ebé besik área fenómenu ne’e.

“Ami husu ba komunidade atu labele pániku ho informasaun oin-oin, liu-liu informasaun hirak ne’ebé ko’alia katak fenómenu refere nu’udar atividade erupsaun vulkániku no husu atu komunidade bele hapara lai atividade besik área refere tanba iha impaktu negativu,” Prezidente IPG hateten ba Agência TATOLI, iha ninia knaar fatin, Rotunda Elemloi Comoro, Dili, tersa ne’e.

Notísia relevante: Erupsaun vulkániku iha Viqueque la afeta ba komunidade

Maski, Prezidiente IPG hatutan área proíbidu ba hala’o atividade iha visinidade vulkániku de lama, maibé iha impaktu pozitivu iha área refere, ne’ebé iha poténsia sai hanesan objetu ba sítiu jeoturizmu no jeolojikamente nu’udár indikasaun hosi ezisténsia mina no gás iha rai okos, ne’ebé sei sai hanesan área ba estudu sientífiku hanesan jeolojia, minerál, petróleu, inklui risku jeolójiku.

Iha impaktu negativu ba fenómenu naturál ne’e tanba materiál hirak ne’ebé sai hosi atividade iha rai leten, asosia no kompostu ho materiál gás no materiál kímika oin-oin, ne’ebé bele fó risku ba saúde, hanesan sistema respiratóriu tanba kontaminadu ho tipu gás sira hanesan Carbon monoxida (CO), Methane (CH4), Acido Hydroclorido (HCL), Hydrogeno Sulfida (H2S), no Amonia (NH3), maibé konteúdu gas ne’e sei prova hosi teste laboratóriu.

Nune’e mós, hosi presaun forte gás hirak ne’ebé sa’e mai rai leten ho temperatura a’as (ahi lakan), bele fó risku ba ema-nia vida no hela fatin.

Daudaun ne’e,  ekipa IPG  preparadu ona atu tun ba terrenu halo observasaun direta hodi bele investiga akontesimentu detallu liuhosi meiu sientífiku.

“Aban, ami-nia ekipa hahú tun ona ba fatin ne’e atu halo investigasaun detatallu tanba hetan ona teste swab no autorizasaun hosi Sala Situasaun-Sentru Integradu Jestaun Krize (SS-CIGC, sigla portugés),” nia informa.

Analiza fenómenu ahi-lakan iha área Raitahu Viqueque

Tuir Prezidente IPG, jeralmente fenómenu naturál ne’ebé akontese iha  Timor-Leste úniku tebes, maibé haree katak ahi-lakan ne’e iha indikasaun ho gás.

Iha tinan 2014 no 2016, IPG halo ona observasaun direita ba área ne’e no liuhosi evidénsia estudu jeolojia iha kampu ne’ebé ekipa kolekta katak karaterístika fenómenu ne’e hanesan vulkaun de lama (mud volcano).

Nia dehan, dala barak sosiadade konfunde entre liafuan vulkaun de lama ho vulkaun (volcano).

Nune’e, nia esplika, jeolojikamente vulkaun de lama ne’e hanesan eventu ne’ebé liga ho atividade erupsaun, ne’ebé kompostu dominante husi materiál tahu (arjila) hosi rai okos korta no halo intruzaun ba materiál sira ne’ebé maka eziste iha rai okos no penetra to’o mai iha rai leten.

Tanba ne’e,  rezultadu hosi fenómenu ida ne’e, jeralmente sempre asosia ho materiál sira seluk hanesan bee, mina no gás inklui fragmentu fatuk sira.

Iha sorin seluk, Prezidente IPG esklarese kona-ba aktividade volkaun, jeolójikamente akontese liuhosi prosesu erupsaun materiál fluida lava hosi rai okos tanba presaun deretendu (melting/magma) iha rai okos no sa’e mai iha rai leten.

“Erupsaun vulkaun de lama akontese tanba iha prosesu jeolójiku liga ho tetóniku ne’ebé ativu, ne’ebé fó presaun maka’as ba formasaun fatuk ne’ebé dominante ho materiál tahu ne’ebé lá estável iha rai okos,” nia akresenta.

Materiál hirak ne’e fasil atu halo movimentu hodi sa’e mai iha superfísiu rai leten tanba iha presaun no liuhosi espasu (fractura ou falha) ne’ebé mosu tanba kauza hosi movimentu tektóniku no atividade sísmiku (rai nakadoko).

Fenómenu ida-ne’e, klasifika ba parte rua hanesan estrutura no ninia materiál ne’ebé eziste de’it iha rai okos hanaran diapirismu (diapirism), no bainhira prosesu diapirismu refere mosu ona mai iha rai leten hanaran volkaun de lama.

“Ida ne’e, sai nu’udar indikasaun no hatudu katak fenómenu vulkaun de Lama iha área refere eziste ona ho tempu naruk,” nia subliña.

Hipotesa ba interpretasaun preliminár  

Prezidente IPG dehan, iha estrutura diapiru ne’ebé kontrolu hosi estrutura jeólojiku hanesan falla, fraktura no dobra sira iha rai okos, hanesan posibilidade gás ne’ebé sa’e mai rai leten, kauza hosi prosesu diapirismu ne’ebé bainhira prosesu intrusaun tahu lori ho materiál gás ho bee sae mai rai leten.

Gás ne’ebé sa’e mai rai leten hatudu hosi ahi ne’ebé lakan maka’as, ne’ebé deskonfia tanba presaun a’as ne’ebé indika prosesu refere mai hosi fatin ne’ebé kle’an  (liu metru ± 2000 ba kraik/rai okos), nu’udár prova ida katak tipu gás hosi fenómenu ida-ne’e ho tipu gás termogéniku.

Nune’e, ahi sa’e boot tebes tanba akumulasaun gás ho durasaun tempu naruk no provoka ho presaun maka’as iha okos, nune’e to’o ikus tenke rebenta sai mai li’ur.

“Ba futuru ekipa IPG sei halo estudu detallu liuhosi métodu jeofízika no estudu perfíl sízmika iha fatin refere hodi bele identifika espasu migrasaun no fatin akumulasaun gás ne’ebé provoka atu rabenta/nakfera sa’e mai rai leten,” nia garante.

Aleinde ne’e, fenómenu ne’ebé akontese iha área Raitahu (Viqueque), hanesan akontese mós iha Oé-cusse (Oessilo), Ranuc-Suai, no parte Indonézia nia hanesan Besikama, Timór Osidentál (NTT, sigla indonéziu).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here