Deputadu Bankada CNRT, Adérito Hugo da Costa. Imajen Tatoli/ Egas Cristóvão.

DILI, 10 maiu 2021 (TATOLI)—Tribunál Distritál Dili (TDD), adia julgamentu ba atuál membru Parlamentu Nasionál (PN), deputadu Adérito Hugo da Costa, tanba kumprimenta ba regra serka sanitária no konfinamentu domisiliáriu iha kapitál Dili.

TDD notifika Adérito Hugo nu’udár arguidu ba kazu deskonfia dada ahi illegál iha tinan 2016.

Notísia relevante:PN autoriza deputadu Adérito Hugo hatán ba TDD iha 10 maiu

Juis titulár, Argentino Neves, hateten prosesu julgamentu labele hala’o iha segunda ne’e, tanba kumpre rezolusaun Governu kona-bá implementasaun serka sanitária no konfinamentu domisiliáriu, hodi evita halibur malu barak.

Nia dehan, iha mós despaixu Konsellu Superiór Judisiál hosi Tribunál Rekursu (TR), iha ámbitu ne’e  TDD atende de’it julgamentu kazu ho karáter urjénsia no kazu kontinuasaun-sira atu asegura prova labele lakon.

“Nune’e ba prosesu ne’e fixa ona loron hodi adia fila-fali ba 19 jullu tinan ne’e  tuku 9:00 otl, hodi rona arguidu no sasin-sira,’’ Argentino Neves  pronunsia iha sala audiénsia TDD.

Nia esplika, Tribunál deside marka fila-fali ba loron ne’e tanba seidauk serteza iha fulan maiu no juñu nia laran, evoluasaun COVID-19 ne’ebé kada loron númeru pozitivu aumenta makaas.

Kona-bá imunidade deputadu Adérito Hugo ne’ebé PN hasai ona, juiz prosesu ne’e esplika, bainhira julgamentu tuir-mai bele marka prezensa no la presiza hasai tan imunidade.

“La impede imunidade ba deputadu ne’e, tanba hasai ona sei fasilita prosesu ba oin kontinua bele tuir julgamentu,” nia subliña.

Iha seegunda ne’e, iha sala audénsia marka prezensa hosi sasin na’in-lima nu’udár funsionáriu hosi Eletrisidade Timor-Leste, Empreza Públika (EDTL-EP), maibé parte Ministéiru Públiku (MP), defeza ho arguidu la marka prezensa, tanba iha loron hirak liu-bá TDD hasai notifikasaun ba prosesu ne’e adia fila-fali ba loron seluk.

Iha 03 maiu 2021, PN fó ona autorizasaun ba deputadu Adérito Hugo da Costa  hodi hatán iha TDD.

PN aprova votu konfirmasaun ne’e hodi halo suspensaun funsaun deputadu Adérito Hugo da Costa, kona-bá efeitu prosedimentu prosesu judisiál, bele hatán iha TDD  nu’udár arguidu kona-bá kazu deskonfia dada ahi ilegál.

Liu hosi eleisaun eskrutíniu sekretu ne’e, aprovadu ho rezultadu votu konfirmasaun a-favór 49, kontra 0 no abstensaun tolu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here