Deputadu Bankada CNRT, Adérito Hugo da Costa. Imajen Tatoli/ Egas Cristóvão.

DILI, 03 maiu 2021 (TATOLI)—Parlamentu Nasionál (PN), segunda ne’e fó autorizasaun ba Deputadu Adérito Hugo da Costa hatán ba Tribunál Dili Distritál Dili (TDD) iha loron 10 maiu semana oin.

Parlamentu Nasionál aprova votu konfirmasaun ne’e hodi halo suspensaun funsaun Deputadu Adérito Hugo da Costa kona-ba efeitu prosegimentu prosesu judisiál nune’e iha loron 10 maiu bele hatán iha TDD nu’udar arguido kona-ba kazu deskonfia dada ahi ilegál.

Liuhosi eleisaun eskrutíniu sekretu ne’e aprovadu ho rezultadu votu konfirmasaun a-favór 49, kontra 0 no abstensaun 3.

“Nune’e rezolusaun suspensaun mandatu ba señor Deputadu Adérito Hugo da Costa ba efeitu prosegimentu prosesu judisiál konfirmadu,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Maibé Aniceto dehan, parlamentu hakarak koopera ho justisa kona-ba kazu ne’e nune’e prosesu bele la’o ho lalais maibé depende ba tribunál.

“Ohin, ita aprova votu konfirmasaun maibé iha loron 10 maiu julgamentu la’o ka lae, se la konsege julgamentu, ne’e problema tribunál nian,” nia akresenta.

Entretantu Deputadu Adérito Hugo da Costa, haktuir ajenda ida-ne’e kleur ona no desizaun parlamentu nian halo tiha ona.

Deputadu Adérito Hugo da Costa, prontu koopera ho tribunál nune’e prosesu ne’e avansa bá oin, maibé realidade iha nível tribunál nian mak enfrenta problema tanba korrespondénsia dahuluk klarifika  tiha ona asuntu ne’e maibé korrespondénsia ne’e nafatin laiha resposta konkretu, nune’e ajenda ne’ebé ke fixa ona kontinua pendente.

Nia dehan, ajenda seluk ne’ebé impede prosesu ne’e tanba mudansa juiz ne’ebé lidera kazu ne’e.

“Ha’u husu atu autoriza hodi aselera prosesu ne’e, tanba ha’u mós lakohi atu prosesu ne’e pendente ho situasaun ida hanesan ne’e. Ha’u ejize atu prosesu ne’e la’o lalais. Ba ha’u iha loron 10 maiu ne’e bele realiza ona julgamentu, lalais liu di’akliu,” Deputada Adérito Hugo akresenta iha plenária.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here