Portavós Governu no Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 01 abríl 2021 (TATOLI)—Governu liuhosi reuniaun Konsellu Ministru (KM) aprova projetu Rezolusaun Governu ba atribuisaun naran Berlin-Ramelau ba ró pasajeiru nasionál daruak ou Nakroma II.

Projetu Rezolusaun Governu ne’e aprezenta hosi Ministru Transporte no Komunikasaun, José Agustinho da Silva.

Ministru Prezidénsia Konsellu Ministru, Fidelis Manuel Leite Magalhães, hateten ró ne’e daudaun halo hela iha Alemaña no iha ona faze finalizasaun, ne’ebé sei to’o iha Timór iha tempu badak.

“Proposta ne’e husu atu Konsellu Ministru deside naran ba ró ne’e, ne’ebé tau naran Berlin-Ramelau. Berlin tanba ne’e kapitál nasaun Alemaña no Ramalau ne’e foho boot Timór nian,” Ministru Fidelis, relata hafoin reuniaun ezekutivu iha Palásiu Governu, kinta ne’e.

Notísia relevante: Ró Nakroma 2 sei to’o Timor-Leste iha setembru tinan ne’e

Governu iha esperansa katak ró ne’e sei to’o iha Timór iha tempu badak nune’e bele tula pasajeiru sira.

Enkuantu, iha loron 31 marsu 2019, Governu Timor-Leste reprezenta hosi Ministru José Agustinho da Silva, asina akordu ho Governu Federál Alemaña no kompañia Estaleiru Navál ‘Damen’ hodi halo konstrusaun Ró Berlin Nakroma II.

Projetu ne’e, Governu Alemaña kontribui millaun €7,8 no Timor-Leste millaun €7,1, ne’ebé tuir planu ró sei halo operasaun dahuluk iha tinan 2021, ho destinasaun hosi Dili bá Manatuto, Baucau, Lautém no Viqueque.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here