Ministra Saude Odete Maria Freitas Belo fahe kamiola ba autoridade lokal sira iha centru saude komoro.Imajen Tatoli/Antonio Goncalves

DILI, 10 maiu 2021 (TATOLI)—Ministériu Saúde (MS) halo abertura imunizasaun COVID-19 doze dahuluk  ba faze daruak, ne’ebé fó prioridade  ba populasaun ho moras króniku  ka komorbilidade idade 60 ba leten, iha munisípiu Dili.

Vasina AstraZeneca ne’ebé utiliza iha faze ne’e, oferese hosi Governu Austrália, hanesan mós ho vasina ne’ebé oferese hosi COVAX facility ho-nia diferensa maka produsaun ketak-ketak, maibé fábrika ida de’it.

Notísia relevante:Governu agradese Austrália ne’ebé oferese AstraZeneca doses rihun 20

“Vasina agora ne’e, prodúz iha Austrália, tanba Primeiru Minsitru, Taur Matan Ruak mak halo komunikasaun ho sira, atu bele hetan doze ruma hosi-sira,” Minsitra Saúde, Odete Maria Freitas Belo, hateten ba jornalista-sira iha Sentru Saúde Comoro, segunda ne’e.

Nia hatutan, Primeiru Ministru mós la’ós husu de’it, maibé tanba Timor Leste (TL) hakarak sosa ho alokasaun orsamentu ne’ebé Governu halo ba kompras 80%-nian.

“Maibé, ita-nia viziñu hakarak oferese uluk doze rihun 20 ba ita, nune’e dozes rihun 24 ne’ebé ita hala’o ona, ohin ita halo lansamentu ba vasina ne’ebé oferese hosi Austrália,’’ nia subliña.

Iha Fatin hanesan, Embaixadór Austrália iha TL, Peter Roberts fó parabens ba TL, ne’ebé susesu hodi fó vasina ba liña frente-sira liu hosi kampaña inísiu hosi COVAX Facility.

Peter Roberts konsidera MS asegura populasaun vulnerável, atu foka ba ema idozu ho komorbilidade  ne’e  importante, tanba agora daudaun iha ona transmisaun komunitária.

“Vasina ne’ebé ami fornese, prodúz hosi Austrália. Ami mós oferse ona ba ema millaun ida iha Austrália. Ohin, ha’u agradese hodi simu vasina  doze dahuluk AstraZeneca,’’ nia hateten.

Vasina faze ida-ne’e foka iha munisípiu Dili

Koordenadora Jerál COVID-19, Ministériu Saúde, Odete da Silva Viegas, hateten vasina AstraZeneca doze dahuluk ba faze daruak ne’ebé Governu Austrália oferese hamutuk doses rihun 20, sei foka liu ba munisípiu Dili.

“Ita foka liu ba Dili, tanba episentru no moras COVID-19 konsentra iha ne’e. Tanba ne’e maka, esforsu Ministériu Saúde  oinsá bele redúz infensaun iha ita-nia sidade. Entaun, ita mós agardese ba ema moras tensaun no diabetes, sira mós mai simu vasina ida-ne’e,’’ Odete da Silva Viegas hateten.

Nia hatutan, iha semana oin bainhira doses rihun 10 mai tan hosi Austrália, maka Governu sei haree hodi espande tan ba munisípiu sira ne’ebé konsidera risku, hanesan Covalima, Bobonaro no RAEOA.

Abertura imunizasaun COVID-19 doze dahuluk ba faze daruak, iha ema na’in 20-resin mak simu, hanesan, Embaixadór Austrália iha TL, Embaixadór Nova Zelándia iha TL ho espoza, Koordenadór Destakamentu Reasaun Rápida Sala Situasaun Sentru Integradu Jestaun Krize (SIJK), Aurélio Guterres, Diretór Sala Situasaun SIJK, Brigadeiru Jenerál, João Miranda ‘Aluk’ Descartes ho espoza,  no populasaun komorbilidade balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here