PNTL Viqueque detein joven mane na’in-haat ne’ebé deskonfia involve iha kazu tuda ambulánsia iha área suku Afoloicai, postu administrativu Watulari, munisípiu Viqueque. Imajen/PNTL.

DILI, 10 maiu 2021 (TATOLI)—Polísia Nasionál Timor Leste (PNTL), liu hosi Komandu munisípiu Viqueque, detein ona joven na’in-haat ne’ebé deskonfia tuda rahun ambulánsia iha área suku Afoloicai, postu administrativu Watulari, munisípiu Viqueque.

Portavóz Komandu Jerál PNTL, Superintendente Xefe, Arnaldo de Araújo, informa suspeitu-sira  PNTL detein iha domingu (09/05) iha sira-nia hela fatin, bainhira parte Serbisu Informasaun Polísia (SIP), halo investigasaun ba kazu ne’ebé akontese iha 05 maiu tuku 19:06 otl.

Notísia relevante:PNTL investiga hela ema tuda rahun ambulánsia iha Afaloicai

“Ita-nia PNTL lori ona mai iha Komandu munisípiu Viqueque, hodi kontinua halo investigasaun, no sei aprezenta kazu ne’e ba Ministériu Públiku (MP),” Arnaldo de Araújo hateten ba jornalista-sira iha Komandu Jerál PNTL, Caicoli, segunda ne’e.

PNTL seidauk bele fó-sai identidade hosi joven na’in-haat ne’e, tanba sei hein prosesu investigasaun kle’an.

“Suspeitu-sira nia indentidade ita seidauk bele fó-sai, tanba sira sei iha faze identifikasaun,” nia subliña.

PNTL deskonfia joven na’in-haat ne’ebé envolve iha kazu ne’e, nu’udár família hosi pasiente COVID-19 balun, ne’ebé ambulánsia tula iha fatin akontesimentu.

PNTL Viqueque mós rekolla ona dadus hosi parte ekipa Ministériu Saúde Pilar VII minisípiu Viqueque, ne’ebé hetan tuda iha kazu ne’e.

Kazu ema deskoñesidu tuda rahun ambulánsia hosi ekipa Pilar VII Jestaun Kazu, bainhira ekipa ba tula pasiente COVID-19 na’in-lima, feto ida no mane haat iha suku Afaloicai.

Akontesimentu ne’e rezulta vidru ambulánsia parte kuana no oin rahun, no motorista ho médiku na’in-rua inklui pasiente COVID-19 na’in-lima, la sofre kanek, maibé trauma.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here