Ekipa Polisia Nasionál Serbisu Investigasaun Kriminál (PNSIK), hala’o detensaun ba suspeitu ne’ebé deskonfia involve iha kazu oho joven ida iha arredór UNPAZ, segunda (10/05/21). Imajen/PNTL.

DILI, 10 maiu 2021 (TATOLI)—Polisia Nasionál Timor Leste (PNTL), liu hosi Polisia Nasionál Serbisu Investigasaun Kriminál (PNSIK), ohin hala’o detensaun ba suspeitu na’in 17, ne’ebé deskonfia involve iha kazu óho Hendrique Soares Maia  (21), iha arredores Universidade da Paz (UNPAZ), ne’ebé akontese iha domingu madrugada (21/06/20).

Suspeitu 17 ne’e kompostu hosi feto rua (2), mane na’in 15, hetan detensaun iha sira-nia hela fatin, suku Bairru-Pité, postu administrativu Dom Aleixo, munisípiu Dili.

Notísia relevante:Kazu UNPAZ, Tribunál Aplika Aprezentasaun Periódika Ba Arguidu 16

Prosesu detensaun ne’e hala’o hodi ezekuta mandadu Tribunál Distritál Dili ho NUC 0031/21.PGGCC.

Durante hala’o detensaun, ekipa investigasaun PNSIK halo uluk esplikasaun ba mandadu Tribunál Distritál Dili, ba suspeitu-sira hodi kalabora ho prosesu investigasaun.

Hafoin halo detensaun, ekipa PNSIK lori kedan suspeitu-sira ba fatin investigasaun PSNIK Komandu Jerál PNTL, sei submete ba detensaun durante oras 72, hodi aprezenta ba Tribunal Distrital Dili (TDD), hodi tuir julgamentu primeiru interogatóriu.

PNSIK mós sei kontinua buka nafatin suspeitu na’in lima (5), ne’ebé deskonfia hala’o vizita ba sira-nia moris fatin iha munisípiu sira.

Tuir lista, iha naran inisiál suspeitu na’in 22 ne’ebé Agência Tatoli rekolla mak hanesan FPG, FTE, QB, M (seidauk indentifika), DLCA, CAH (seidauk indentifika), FCSM, SPJ, JLFO, JPST, AVRMC, LSV, JSCA, JS, DPS, LSM, JCRA, ZCCA, GPD, J (seidauk indentifika),  no JK.­

Antes ne’e, PNTL lori kedan matebian Hendrique Soares Maia ba Ospitál Nasionál Guido Valares (HNGV), hodi halo autopsia, ikus-mai entrega ba parte família hodi hala’o serimónia funerál iha matebian nia moris fatin munisipiu Ermera.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here