Arguidu na'in-16 submete ba audensia primeiru interogatoriu iha TDD, tersa (23/06/2020). Imajen/Nelson de Sousa

DILI, 23 juñu 2020 (TATOLI) – Tribunál Distritál Dili (TDD) liuhosi primeiru interrogatóriu, ohin,  aplika medida koasaun aprezentasaun periódika (AP) ba arguidu na’in-16 ne’ebé deskonfia envolve iha kazu konfrontu iha Universidade da Paz (UNPAZ) ne’ebé rezulta Hendrique Maia Soares, tinan 21, mate fatin iha arredores UNPAZ nian, domingu, tuku 02:00 madrugada Otl.

Notísia Relevante : Konfrontu UNPAZ, Família Matebian Hendrique Husu Prosesa Tuir Lei

Arguidu sira-ne’e ho inisiál RJCB, JRA, BDJ, CDAG, FC, DI, ABFT, HMA, AMU, MM, LDSDJ, JPJ, AJP, JSJ, JCM no FAM, ne’ebé kumpre ona detensaun durante oras 72 nia laran iha Komandu Polísia Nasionál Timor-Leste (PNTL) Munisípiu Dili.

Arguidu sira tula hosi karreta detensaun PNTL to’o iha Tribunál Dili, tuku 17:30 Otl, hodi submete kedas ba audiénsia primeira interrogatóriu iha TDD.

Juis singular João Ribeiro aplika medida koasaun aprezentasaun periodika ne’e ho razaun tanba prosesu ho prova ne’ebé aprezenta hosi Ministériu Públiku (MP) seidauk hatene loloos motivu hosi mate no foin iha faze investigasaun nia laran ne’ebé seidauk klaru no arguidu balun ne’ebé hanesan estudante presiza kontinua sira -nia estudu hodi hein prosesu sira tuir mai.

Defeza Marçal Mascarenhas ne’ebé fó asisténsia legal ba arguidu sira hateten desizaun Tribunál nian ne’e adekuadu no fundamentu tanba seidauk hatene loloos motivu hosi kazu refere.

”Tribunál aplika medida aprezentasaun periodika ba arguidu no Termu Identidade Rezidénsia hodi hela iha uma no aprezenta mensalmente kada fulan ba iha estasaun polísia ne’ebé besik hodi hein investigasaun to’o kazu ne’e remata,” hateten Defensór Públiku Marçal Mascarenhas.

Ministériu Públiku iha primeiru interrogatóriu husu Tribunál atu aplika prizaun preventive ba arguidu sira tanba haree ba aktu krime hamate halakon vítima Hendrique Maia Soares nia vida.

MP promove arguidu sira ho krime omisídiu simples iha artigu
138 kódigu penal Timor-Leste.

Audiénsia primeiru interrogatóriu ne’e prezide husi juis singular, João Ribeiro, Ministériu Públiku reprezenta hosi prokuradór Ricardo Leite no arguidu sira hetan asisténsia legal hosi Defensor Públiku Marçal Mascarenhas, Jonas Henrique advogada privadu Virna de Carvalho ho Adelina Meluk.

Jornalista   : Nelson de Sousa

Editór        : Francisco Simões

 

1 KOMENTÁRIU

  1. Oinsa ho Matebian nia maluk nain3 neebe tuir informasaun dehan polisia detein hela??
    Investigasaun to’o iha ne’ebé?
    Lolos nee sira nain tolu nee mak bele esplika rajaun saida mak sira ba unpaz kalan bo’ot, kondisaun lanu, tamba saida mak sira nain tolu bele fila maibe matebian la konsege fila?
    Monu husi andar leten ga lae?
    Tamba saida mak motor matebian nia iha estrada hela kalsa naruk mos hasai hotu!????
    Obrigado karik liafuan ruma la kona laran husu deskulpa,
    Maibe tenke koalia tamba ne’e rejulta ema nia hakotu vida,
    Triste tebes ba familia,
    Deskansa em paz belun!!

HAKEREK NO HATÁN

Please enter your comment!
Please enter your name here