Vasina AstraZeneca. Imajen TATOLI/António Gonçalves

DILI, 10 maiu 2021 (TATOLI)Embaixadora Malázia iha Timor-Leste, Sarimah Akbar, apresia no agradese Governu tanba autoriza diplomata sira ne’ebé hala’o knaar bele simu vasina prevensaun COVID-19 tipu AstraZeneca.

“Ha’u agradese ba Primeiru-Ministu, Taur Matan Ruak, tanba Governu autoriza komunidade diplomata iha Timor-Leste simu vasina, tanba ne’e maka ami agradese tebes. Ba ha’u pesoál rasik no funsionáriu tomak Embaixada Malázia simu hotu simu ona vasina,” Embaixadora Sarimah Akbar, hateten hafoin ramata reuniaun ho Xefe Governu iha Rezidénsia Farol, segunda ne’e.

Notísia relevante: Ema hamutuk 28.678 simu ona vasina AstraZeneca

Diplomata ne’e espera povu Timor-Leste tomak bele simu vasina ne’e, nune’e nia enkoraja populasaun atu simu vasina.

“Ha’u husu povu Timor-Leste labele tauk vasina tanba importante tebes atu nune’e ita bele hakotu transmisaun COVID-19 no bele halo filafali atividade normál. Ami na’in-tolu hosi Malázia simu ona vasina inklui mós funsionáriu embaixada nian hamutuk ho sira-nia família, exetu sira-nia oan idade menus hosi tinan 18 tanba tuir kritéria idade 18 mai kraik seidauk bele simu vasina AstraZeneca,” nia akresenta.

Reprezentante Malázia ne’e fó sasin, hafoin simu vasina sente moras oituan hanesan ulun moras, isin manas, maibé liu tiha faze ne’e sente di’ak tebes, tanba ne’e reasaun oituan de’it hosi vasina.

Tuir Sarimah Akbar, vasina ne’e importante tebes atu prevene-an hosi vírus ne’e tanba moras COVID-19 perigu tebes, realidade iha Malázia antes ne’e laiha ona, maibé agora komesa fali no situasaun ne’e hanesan mós ho Timor-Leste nian.

“Tanba ne’e, iha Malázia, Governu obriga populasaun tenke simu vasina. Espera katak Timor-Leste bele serbisu hamutuk ho nasaun sira ne’ebé ajuda vasina hodi bele komunidade hotu simu vasina hodi prevene vírus ne’e,” nia hatutan.

To’o 01 maiu, ema 28.678 iha territóriu tomak simu ona vasina AstraZeneca doze dahuluk, hosi vasina ne’ebé Timor-Leste simu iha faze dahuluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here