Médiku-sira hala’o teste swab obrigatóriu iha sede suku Caicoli, sesta (7/05/21). Imajen Tatoli/António Gonçalves.

DILI, 09 maiu 2021 (TATOLI)—Sala Situasaun Sentru Integradu Jestaun Krize (SIJK), rejista kazu pozitivu COVID-19 hamutuk 116, rekoperadu 81 no ativu 1.540.

“Kazu 116 ne’e, iha Dili 98, no Munisípiu seluk 18. Númeru hirak ne’e, mane 66 no feto 50. Sira ne’ebé ho idade 60 na’in-ualu. Proporsaun kazu sintomátiku hamutuk 10,3%,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, domingu ne’e.

Notísia relevante:COVID-19: Kazu pozitivu iha Dili 146, RAEOA tolu

Totál kazu konfirmadu kumulativu ohin, sura hosi 21 marsu 2020 hamutuk 3.227. Hosi horisehik mai ohin, hamutuk hotu Laboratóriu Nasionál Saúde halo testes PCR 1.256 iha Dili, ho detalla hanesan tuir mai, Vijilánsia sentinela 25, Rastreiu ba kontaktu ka Contact tracing 56, Rastreiu Aleatóriu Random Screening  780,  Viajen sai hosi serka sanitária Munisipiu Dili 380, Viajen internasionál 0, Follow up iha quarentena 15.

Totál testes PCR ne’ebé halo horiseik dia 8 maiu iha Munisipiu sira seluk hamutuk 374, ho detalla hanesan tuir mai, Baucau 120, Ermera 42, Maliana laiha, Maubisse 132, RAEOA laiha, Suai 39,  Viqueque 41.

Atu bele hatene surtu ida ninia evolusaun, no mós surtu ne’e aumenta ka diminui, indikador ida ne’ebé matenek-na’in epidemiolojia nian uza, maka insidénsia.

Konvensionalmente insidénsia sukat totál kazu foun, kada loron, pur 100 mil habitantes, no hatudu risku ne’ebé populasaun iha atu hetan da’et moras ida.

Média (rata-rata) ohin, hosi insidénsia Covid-19 iha Timor-Leste durante loron 7 ikus maka 7,8/100 mil abitantes, enkuantu ba de’it Munisipiu Dili horisehik nian 25,7/100 mil abitantes.

Insidénsia iha leten sei nafatin hatudu katak Munisipiu Dili maka fatin ho risku bo’ot liu atu populasaun hetan da’et no hada’et tutuan virus SARS-CoV-2.

Informasaun

Iha 9 maiu 2021, izolamentu Vera Cruz halo tratamentu ba kazu detetadu na’in 31. Iha área obstetrisia nain 11, sirurjia ida, medisina interna nain 17, pediatria na’in rua. Sira na’in 11 iha obstetrisia, kategoria moderadu hotu, sira nia kondisaun estável.

Sira na’in 17 iha medisina interna, rua grave uza oksijéniu, na’in 15 moderadu. Kazu sirurjia, tama ho open fracture, médiku espesialista ortopédiku halo ona atendimentu espesializadu iha sala oeprasaun Vera Cruz nian. Hosi kazu rua pediatria, moderadu hotu.

Aproveita oportunidade hato’o fali detalla kona-bá óbitu ida ne’ebé akontese horiseik, 8 maiu 2021, hanesan tuir mai, Feto, idade tinan 70, tama iha Vera Cruz iha  5 maiu 2021, ho diagnoze traballu Sindroma Insufisiénsia Respiratória Aguda (SIRA) plus Severe Anemia.

Ninia rezultadu PCR iha 5 maiu hatudu pozitivu ho Cycle Treshold (CT) N2 gene 28,2 & E gene 26,7. Durante loron 2 iha Vera Cruz, médiku espesialista sira halo tratamentu tuir protokolu ne’ebé adopta iha HNGV ba kazu hanesan. Tramentu inklui oksijéniu no transfuzaun ran.

Pasiente hakotu-i’is iha 8 maiu. Ninia rezultadu PCR post-mortem ka hafoin i’is kotu nafatin pozitivu ho CT N2 Gene 18,3 & E Gene 16,4.

Familia deside atu lori ba hakoi iha Uatulari, tuir protokolu funerál kazu mate ho COvid-19 ne’ebé Timor-Leste adopta ona.

Hakarak fo’o hanoin hikas ba públiku katak bele uza númeru hotline 119, hodi kontakta ekipa operasionál iha Ministeriu Saúde. Ezemplu, bainhira hakarak halo swab ba teste PCR, bele kontakta 119, hafoin ema ne’ebé atende telefone sei enkamiña ba ekipa vijilánsia epidemiolójika hodi bele organiza.

Nune’e mós bainhira ida dúvida ka presiza atendimentu ruma relasiona ho Surtu Covid-19, halo favór liga ba 119.

Aproveita informa mós ba públiku katak, fatin atu halo teste PCR maka hanesan tuir mai, bainhira sente moras isin-manas, mear, kakorok moras ka sintoma seluk tan, bele ba konsulta iha Sentru Saúde ne’ebé besik, atu bele halo swab.

Apela ba populasaun iha Dili laran no mós iha Munisipiu sira seluk, atu aprezenta-an iha fasilidade saúde públiku (Sentru Saúde ka Ospitál) ne’ebé besik, bainhira sente isin-manas, ka kakorok moras, ka inus-ben, ka mear, hodi bele hetan atendimentu hosi profisionál saúde sira.

Ba populasaun iha Timor-Leste laran tomak, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras Covid-19 da’et ba mai.

Regra sira ne’e, hanesan ita hotu hatene ona, maka  uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta-malu, la presiza ka’er liman, bensa-liman, rei-malu ka haku’ak malu, evita halibur-malu barak, hamri’ik ka tur do’ok hosi ema seluk, mínimu metru ida ho balun.

Jornalista: Evaristo Martins

Editór: Cipriano Colo

HAKEREK NO HATÁN

Please enter your comment!
Please enter your name here