Membru PNTL hala’o patrullamentu hodi asegura situasaun serka sanitária iha Dili, sesta (12/03/21). Imajen Tatoli/António Gonçalves.

DILI, 08 maiu 2021 (TATOLI)—Komandante Polísia Munisípiu Dili, Superintendente Xefe, Henrique da Costa informa membru Unidade Espesiál Polisia (UEP), Batallaun Orden Públiku (BOP) no Unidade Polísia Maritima (UPM) kontinua ajuda PNTL Dili hodi kontrola ba bairru sira-ne’ebé identifika risku mean ba konflitu iha kapitál Dili.

Notísia Relevante: PNTL detein joven na’in-rua falsifika dokumentu viazen

PNTL Dili ho membru 500 inklui Ofisiál Polísia Suku (OPS) koordena nafatin autoridade suku no Konsellu Polisiamentu Komunitaria KPK 600-liu ne’ebé desteka ona iha suku 36 iha área jurisdisaun Munisípiu Dili kompostu hosi Postu Administrativu Metinaro, Ataúro, Hera, Don Aleixo, Vera Cruz no Cristu Rei nian.

“Ba fatin sira-ne’ebé ita identifika risku ba konflitu mezmu ita-nia membru la to’o atu harii postu iha ne’ebá, maibé ita hetan ajuda hosi ita-nia polisia UEP, BOP no UPM ajuda ita durante ne’e halo patrullamentu rutina,” Komandante Polísia Munisípiu Dili ne’e hateten ba jornalista sira liuhosi konferénsia imprensa ne’ebé hala’o iha Komandu PNTL, Caicoli, Dili, sábadu ne’e.

Nia dehan, PNTL Dili mós seidauk bele aprova pedidu autoridade suku atu harii tan postu seguransa iha bairru sira-ne’ebé risku ba konflitu, tanba daudaun ne’e membru polísia konsentra asegura fatin kuarentena no operasaun iha Dili laran asegura implementasaun Estadu Emerjensia no Serka Sanitária.

“Ita hetan pedidu hosi ita-nia xefe suku Bairru-Pité, Xefe Aldeia Haburas, Xefe Aldeia Wedalak no área Becora Temporál nian atu harii postu seguransa, maibé ita haree ba situasaun agora ita nia rekursu sei uza tomak fatin kuarentena iha kapitál Dili no halo operasaun iha Dili laran,” nia hateten.

Tanba ne’e, PNTL Dili husu kooperasaun ba autoridade suku no membru KPK sira bainhira mosu kazu ka krime ruma, kontaktu kedas PNTL halo atuasaun tuir lei hodi bele lori sidade Dili sai fatin hakmatek.

Jornalista: Eugénio Pereira

Editór: Cancio Ximenes

HAKEREK NO HATÁN

Please enter your comment!
Please enter your name here