Polísia Munisípiu Dili, detein joven na’in-rua falsifika dokumentu viazen, sesta (07/05/21). Imajen Tatoli/Eugénio Pereira.

DILI, 06 maiu 2021 (TATOLI)—Polísia Nasionál Timor Leste (PNTL) liu hosi Komandu munisípiu Dili, detein joven na’in-rua ne’ebé halo falsifikasaun dokumentu viazen, hosi munisípiu Liquiça tama mai Dili.

Joven na’in-rua ho inisiál AP no CBTS, hetan detensaun iha 06 maiu 2021 tuku 15:00 otl, bainhira Polísia Postu Vizilánsia Tasi-tolu hala’o pasa revista ba dokumentu viazen.

Notísia relevante:Dezobediénsia, PNTL prosesa abitante 95 ba MP

Komandante PNTL munisípiu Dili, Superintendente Xefe, Henrique da Costa, dehan PNTL halo investigasaun ba karta autorizasaun viazen tama-sai munisípiu ne’ebé suspeitu na’in-rua uza, falsifika de’it ho modelu kopia.

AP nu’udár kondutór no CTS nu’udár sasán-na’in ne’ebé transporta ho kareta marka Mega Carry Suzuki koo mutin ho xapa matríkula A.20-090 TL.

PNTL halo indentifikasaun ba dokumentu viazen ne’ebé joven na’in-rua lori mak hanesan, dokumentu guia da marsa tahan rua, maibé la’ós orjinál no copia de’it, atestadu médiku tahan ida. CTBS mak taka de’it nia-naran ka la’ós dokumentu auténtiku, hasai hosi Sentru Integradu Jestaun Krize (SIJK), no dokumentu atestadu saúde rezultadu teste swab tahan ida.

“Haree ba dokumentu falsu iha leten, maka polísia halo kedan detensaun ba sira na’in-rua no asegura  dokumentu falsu ne’ebé sira lori, hodi submete ba prosesu iha Tribunál,” Komandante Henrique hateten ba jornalista-sira iha Komandu PNTL, Caicoli, Dili, sesta ne’e.

Joven na’in-rua ne’e rejistadu ho NUC:0220/21.DICRM ne’ebé konsidera kontra artigu 303, kona-bá falsifikasaun ba dokumentu notasaun tékniku KP.

Oras-ne’e daudaun joven na’in-rua sei detein iha sela Polísia Caicoli, Dili hodi hein prosesu invesitasaun oras 72, bainhira remata aprezenta kazu ba Ministériu Públiku (MP).

PNTL sei kontinua halo kontrolu makás ba movimentu abitante iha postu Seguransa área Cristu Rei, Becora, Lahane, Manleuana no Tasi-tolu.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here