Konversa via telefónika entre Primeiru-Ministru, Taur Matan Ruak, no ninia omológu australianu, Scott Morrison. Imajen/GPM

DILI, 06 maiu 2021 (TATOLI)Primeiru-Ministru (PM), Taur Matan Ruak, iha kuarta lorokraik, hetan xamada telefónika hosi ninia omológu australianu, Scott Morrison, hodi hato’o pozisaun nasaun viziñu ne’e ba Timor-Leste relasiona ho situasaun atuál.

“Austrália reitera apoiu no solidaridade ba Timor-Leste iha luta kontra pandemia surtu COVID-19 no dezastre naturál ne’ebé akontese iha loron 04 abríl liubá,” refere nota ne’ebé Agência TATOLI asesu, kinta ne’e.

Durante konversa via telefónika durante minutu 27, Xefe Governu nasaun rua aprofunda liután diskusaun kona-ba relasaun no kooperasaun país rua ba oin, ne’ebé Governu Austrália prontu ajuda nafatin Timor-Leste iha área saida de’it mak presiza.

“Ha’u hakarak agradese Señor Primeiru-Ministru ba telefonema ne’e, depois ita ko’alia iha loron 27 abríl tinan kotuk, ohin kompleta tinan ida liu. Tanba ne’e prazer rona ita-boot nia lian no aproveita momentu ida-ne’e hakarak manifesta ha’u-nia solidariedade tomak no profundu sentimentu kondolénsia ba vítima COVID-19 iha Austrália no dezastre sira seluk nian,” PM Taur dehan.

Notísia relevante: Governu agradese Austrália ne’ebé oferese AstraZeneca doses rihun 20

Nune’e, hodi Governu no povu Timor-Leste nia naran, PM Taur agradese tebes ba apoiu no solidariedade hosi Governu no povu australianu sira.

Enkuantu, iha marsu liuba, Xefe Governu Timor-Leste hakerek karta ofisiál ida ba nia ómologu australianu, Scott Morrison hodi husu apoiu vasina ne’ebé Timor-Leste hetan ona.

Karta ofisiál ne’e hetan resposta pozitivu, katak Governu Austrália prontu apoiu Timor-Leste nia programa vasinasaun, ne’ebé iha semana ne’e pakote dahuluk vasina tipu AstraZeneca doze  20.000 to’o ona iha Dili.

Governu Timor-Leste define ona meta katak pelu menus to’o tinan ida ne’e nia rohan, bele ona kobre vasina ba populasaun tomak iha territóriu laran entre 80% to’o 90%.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here