Produtu Cesta Bázika iha bote Imajen TATOLI/Antónia Gusmão

DILI, 07 maiu 2021 (TATOLI)—Progresu implementasaun programa cesta bázika iha Timor-Leste la’o di’ak no maiória populasaun (85%) iha territóriu Timor-Leste simu ona cesta bázika maibé populasaun 4.407 hosi uma kain 683 iha Suku Samalari, Postu Administrativu Baucau Vila, Munisípiu Baucau, to’o agora seidauk simu cesta bázika.

Notísia Relevante: Populasaun 85% iha territóriu nasionál simu ona Cesta Bázika

“Ami-nia povu hosi Suku Samalari to’o agora seidauk simu cesta bázika maske iha suku balun simu ona no tama tan ona ba faze daruak reklamasaun nian, maibé ami seidauk simu dala ida,” Xefe Suku Samalari, Postu Administrativu Baucau Vila, Munisípiu Baucau, Sorteiro Magno Sequeira, informa ba Agncia TATOLI liuhosi telefónika, sesta ne’e.

Lideransa lokál ne’e hatutan, foin lalais ne’e Diretór Sentro Lojístika Nasionál (CLN-sigla portugés) kontaktu ona atu simu cesta bázika ne’e maibé sasán seidauk kompletu tanba foin mak iha foos no mina de’it.

“Sira hosi CLN mak atu fahe mak dehan fahe uluk uitoan-uitoan hanesan foos ho mina uluk, entaun ha’u dehan ba CLN katak atu di’ak liu sasán kompleta tiha kedas mak fó dala ida. Tanba ami tauk imi fó uitoan-uitoan mak mosu fali polítika seluk entaun dala ruma imi husik tiha de’it. Tanba ne’e, sasán kompleta lai mak fahe dala ida ba ha’u-nia komunidade iha loron ida-rua nia-laran,” nia dehan.

Nia hein katak iha fulan-maiu nia laran ne’e populasaun Suku Samalari bele simu ona Cesta Bázika tanba iha ámbitu COVID-19 ne’e hahú fali ona ho programa cesta bázika ne’e.

“Parese tempu badak nia-laran komunidade Samalari mós simu ona Cesta Bázika tanba Governu nia planu ne’e komesa la’o ona no fiar katak iha fulan-maiu nia laran ne’e bele realiza ona,” nia dehan.

Xefe Suku informa Suku Samalari iha aldeia haat mak aldeia Samalari, Festau, Ossoluga no Sorulai ho Xefe família hamutuk 683.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here