Komunidade Comoro-Dili, troka voucher Cesta Bázika iha supermerkadu Leader, kinta (10/12/20). Imajen Tatoli/António Gonçalves.

DILI, 05 maiu 2021 (TATOLI)-Ministru Koordenadór Asuntu Ekonómiku (MKAE), Joaquim Martins, hateten maioria populasaun iha territóriu Timor-Leste simu ona Cesta Bázika, ne’ebé reprezenta 85%.

“Progresu di’ak tanba atinje ona 85% no benefisiáriu sira ne’ebé simu hamutuk 1.105.000, ne’ebé ha’u bele dehan númeru ne’e boot tanba Rejiaun Administrativa Espesiál Oé-cusse Ambeno (RAEOA) mós atinje ona 50%,” Ministru Koordenadór Asuntu Ekonómiku relata iha resintu Ministériu Finansa (MF), kuarta ne’e.

Tuir governante ne’e, progresu implementasaun Cesta Bázika la’o ho di’ak, maski situasaun difísil atu halo movimentasaun maibé kompañia tenta kumpre kontratu atu lori ai-han ba komunidade ne’ebé la halo movimentu tanba Serka Sanitária maibé sira iha direitu asesu ba ai-han.

Ministru dehan, razaun kompañia kontinua fahe Cesta Bázika iha períodu Serka Sanitária tanba Governu nota katak komunidade iha tempu ne’e presiza tebes ai-han.

Notísia relevante: MF halo ona pagamentu Cesta Bázika ba kompañia lokál 102

Maski nune’e, MKAE mós rekoñese katak iha postu administrativu no suku balun seidauk simu, maibé daudaun ne’e ministériu implementadór sira organiza hela hamutuk ho kompañia atu bele distribui hotu.

“Sira ne’ebé seidauk simu oitoan de’it ona, maibé iha Dili mak ema barak seidauk simu hanesan iha postu administrativu sira falta de’it suku rua ou tolu mak seidauk simu,” nia akresenta.

Kona-ba postu administrativu ne’ebé mak populasaun hotu seidauk simu Cesta Bázika, Ministru klarifika, tanba iha problema administrativa.

Notísia relevante: Komunidade iha  Laleia seidauk simu Cesta Bázika

“Loos duni, iha Laleia seidauk simu hotu, tanba iha problema ida entre kompañia bainhira asina kontratu ona maka identifika problema tanba ne’e retira, entaun avansa fali ho kompañia foun ida,” nia esklarese.

Maski nune’e, problema ne’e rezolve ona no orsamentu mós aprova ona, tanba ne’e tempu badak sei distribui.

“Ha’u la hatene problema saida, maibé hafoin ha’u simu relatóriu katak iha mudansa kompañia,” nia hatutan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here