Ekipa Saúde na Familia (SnF) kontinua hala’o Sentinela Ativa ka Active Case Finding, iha sede suku Caicoli, Munisípiu Dili, sesta (07/05/21). Imajen Tatoli/António Gonçalves.

DILI, 7 maiu 2021 (TATOLI)—Ekipa Saúde na Familia (SnF) iha Munisipiu Dili, kontinua hala’o Sentinela Ativa ka Active Case Finding, hodi buka-tuir no deteta kazu pozitivu iha bairru no aldeia iha Dili laran.

Sentinela Ativa ne’ebé hala’o hahú hosi 4  to’o 6 maiu 2021, ekipa Saúde na Familia (SnF) konsege deteta kazu pozitivu barak-liu iha bairru no aldeia iha Dili laran.

Notísia relevante:COVID-19: pozitivu 95 iha Dili

Koordenadór Forsa Tarefa ba Prevensaun no Mitigasaun, Rui Maria de Araújo, hateten iha loron tolu nia laran, ekipa SnF foti  amostras 660  hodi halo Rapid Antigen Test, hafoin konfirma ho teste  PCR,  iha 31 mak pozitivu COVID-19 ka hanesan ho 4,6%.

“Sira ne’ebé pozitivu iha opsaun rua,  halo izolamentu iha fasilidade ne’ebé Estadu prepara, ka opsaun seluk halo autoizolamentu,” Rui Maria de Araújo, hateten liu hosi komunikadu iha sesta ne’e.

Médiku ne’e esplika, bainhira sira-nia uma prienxe kondisaun mínimu, ekipa SnF ho líder komunitáriu mak monitoriza no halo fiskalizasaun ba kumprimentu regra autoizolamentu.

Ekipa SnF iha munisípiu Dili sei kontinua serbisu hodi implementa mekanizmu Sentinela Ativa iha bairru no aldeia sira.

Ohin, Sala Situasaun Sentru Integradu Jestaun Krize (SIJK) rejista tan kazu pozitivu COVID-19 hamutuk 95 ne’ebé detetadu hotu iha Dili, rekoperadu 147 no ativu 1.365.

SIJK husu ba populasaun iha Timor-Leste laran tomak, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras ne’e da’et ba mai.

Regra sira ne’e mak hanesan mak uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka haku’ak-malu,  evita halibur-malu barak, hamri’ik ka tur do’ok hosi ema seluk, mínimu metru ida ho balun.

Jornalista : Felicidade Ximenes

Editór : Cipriano Colo

HAKEREK NO HATÁN

Please enter your comment!
Please enter your name here