Médiku-sira halo teste swab ba abitante iha Dili, sesta (05/05/21). Imajen Tatoli/António Gonçalves.

DILI, 07 maiu 2021 (TATOLI)—Sala Situasaun Sentru Integradu Jestaun Krize (SIJK), ohin, rejista kazu pozitivu COVID-19 hamutuk 95 iha de’it munisípiu Dili, rekoperadu 147 no kazu ativu 1.365.

“Kazu foun ohin 95 iha hotu munisípiu  Dili, rekoperadu na’in 147 no totál kazu ativu 1.365. Totál kazu komfirmadu kumulativu sura hosi 21 marsu 2020 hamutuk 2.965,’’ Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, sesta ne’e.

Notísia relevante:COVID-19: pozitivu 84, rekoperadu 81 no ativu 1.417

Hosi totál kazu detetadu foun ohin mane 57 no feto 38. Kazu hirak-ne’e, ho idade tinan 12 na’in-neen, entre tinan 12-59 na’in 86 (95,2%) ho idade 60 na’in-tolu.

Hosi horisehik mai ohin, hamutuk hotu Laboratóriu Nasionál Saúde halo  testes PCR 847 ho detalla hanesan tuir mai, Vijilánsia sentinela 30, Rastreiu ba kontaktu ka Contact tracing 50, Rastreiu Aleatóriu ka Random Screening 585, Viajen sai hosi serka sanitária Munisipiu Dili 157,  Viajen internasionál 13, Follow up iha kuarentena 11.

Totál testes PCR ne’ebé halo horisehik 6 maiu, iha Munisípiu-sira seluk hamutuk 416 ho detalla hanesan tuir mai, Baucau laiha, Maliana 17, Maubisse 155,  Suai 49,  Ermera 80,  Viqueque 71, RAEOA 44.

Tabela evolusaun surtu COVID-19 iha Timor-Leste hosi 21 marsu 2020 to’o  7 maiu 2021, Aileu ualu, totál kumulativu  kazu rekoperadu ida,  totál kazu ativu ohin  hitu kazu esporádiku.

Ainaro 22, kazu rekoperadu rua, kazu ativu ohin 20 kazu esporádiku. Baucau 148, kazu rekoperadu 24 totál kazu ativu ohin 124 kazu  iha cluster. Bobonaro 17, kazu rekoperadu ualu, ativu ohin sia kazu esporádiku.

Covalima 54, rekoperadu 18, kazu ativu ohin 36 kazu iha cluster. Dili 2451, totál kazu oras 24 iha 95, kazu rekoperadu 1.323, kazu ohin 1.124, totál kumulativu óbitu haat kazu iha transmisaun komunitária.

Ermera 49, kazu rekoperadu 12,  ativu ohin 37 kazu iha cluster. Lautém 22, rekoperadu tolu, ativu 19, kazu esporádiku. Liquiça 15, rekoperadu sia, ativu neen  kazu esporádiku. Manatuto neen, rekoperadu  ida,  ativu lima  kazu esporádiku.  Manufahi 52, kazu rekoperadu 35,  kazu ativu ohin 17 kazu iha cluster.

RAEO hitu, rekoperadu haat, ativu tolu kazu esporádiku.  Viqueque 19, rekoperadu sia, ativu ohin 10 kazu iha cluster.

Atu bele hatene surtu ida ninia evolusaun, no mós surtu ne’e aumenta ka diminui, indikadór ida ne’ebé matenek-na’in epidemiolojia nian uza, maka insidénsia.

Konvensionalmente insidénsia sukat totál kazu foun, kada loron, pur abitante rihun 100, no hatudu risku ne’ebé populasaun iha, atu hetan da’et moras ida.

Hatudu kazu detetadu foun kada loron iha Timor-Leste tomak, ba ohin loron, hosi insidénsia COVID-19 iha Timor-Leste durante loron hitu ikus maka 6,6/abitante rihun 100, enkuantu ba de’it Munisípiu Dili ohin loron nian 22,5/abitante rihun 100. 

Insidénsia iha leten, sei nafatin hatudu katak, Munisípiu Dili mak fatin ho risku bo’ot liu atu populasaun hetan da’et no hada’et tutan virus SARS-CoV-2.

Iha 7 maiu 2021, izolamentu Vera Cruz halo tratamentu ba kazu detetadu na’in 37. Iha área obstetrisia na’in 14, medisina interna na’in 18, pediatria na’in lima. 

Sira na’in 14 iha obstetrisia, kategoria moderadu hotu, sira-nia kondisaun estável. Sira na’in 18 iha medisina interna, haat grave uza hotu oksijéniu, na’in 14 moderadu. 

Hosi kazu lima  pediatria, haat moderadu, ida  grave. Na’in ida grave uza CPAP, no haat moderadu la uza ona oxijéniu.

Aproveita informa ba públiku katak, hahú ohin ba oin, autoridade saúde deside ona atu adopta rekomendasaun OMS nian relasiona ho kritériu atu fó alta ka deklara kazu detetadu ida rekoperadu ona, ka seidauk.

Kritériu ne’ebé aplika iha fatin ho transmisaun komunitária hanesan iha Munisípiu Dili maka loron 10 hafoin teste PCR pozitivu ka hafoin mosu sintomas, plus loron tolu  tan, bele ona alta.

Ida-ne’e signifika, hafoin ema ida hetan pozitivu iha ninia teste PCR, ka hafoin ema ne’e hahú sente iha síntomas, liu tiha loron 13, nia bele ona alta hosi izolamentu ka bele konsidera nu’udár rekoperadu.

Aproveita informa mós ba públiku katak, fatin atu halo teste PCR maka hanesan tuir mai, bainhira sente moras isin-manas, mear, kakorok moras ka sintoma seluk tan bele ba konsulta iha Sentru Saúde ne’ebé besik, atu bele halo swab.

Bainhira atu husu autorizasaun esesionál sai hosi serka sanitária iha Dili, bele ba halo swab iha Centro Convenções Dili (CCD).

Bainhira sente katak, sai kontaktu-besik ba ema ruma ne’ebé deteta pozitivu ona, no seidauk hetan kontaktu hosi ekipa konjunta saúde  bele liga ba númeru 119 atu organiza oin sá foti swab.

Ekipa Saúde na Familia (SnF) iha Sentru Saúde sira iha Dili, halo mós vizita ba bairru ho aldeia sira ne’ebé detetadu kazu barak ona.

Sira ne’ebé iha sintomas, ka sente kontaktu besik ho kazu pozitivu ruma, bele hakbesik ba sira hodi halo swab.

Apela ba populasaun iha Timor-Leste laran tomak atu tu’ur hakmatek, kumpri ho rigór regra serka sanitária no konfinamentu domisiliáriu ne’ebé Konsellu Ministru deside ona implementa hahú 30 abríl.

Husu atu hotu-hotu kolabora ho autoridade saúde, hodi bele buka-tuir ema hotu ne’ebé hetan da’et ona virus ne’e, no izola hosi ema ne’ebé seidauk hetan da’et tutan.

Apela ba populasaun iha Dili laran no mós iha munisípiu-sira seluk, atu aprezenta-an iha fasilidade saúde públiku hanesan Sentru Saúde ka Ospitál ne’ebé besik, bainhira sente isin-manas, ka kakorok moras, ka inus-been, ka mear, hodi bele hetan atendimentu hosi profisionál saúde sira.

“Bainhira sedu liu hatene se virus ne’e kona ita ka la’e, di’ak liu, hodi nune’e bele hetan atendimentu sedu liu, no prevene tama ba iha situasaun ne’ebé hanaran sindroma insufisiénsia respiratória aguda (SIRA), ka susar ka difisil atu dada-i’is,” Rui Maria de Araújo subliña.

SIJK husu ba populasaun iha Timor-Leste laran tomak, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras ne’e da’et ba mai.

Regra sira ne’e mak hanesan mak uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka haku’ak-malu,  evita halibur-malu barak, hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here