Dezintendimentu entre membru PNTL ho populasaun iha Sentru Formasaun Polísia (CFP sígla portugés), Comoro, bainhira halo teste swab masal tanba kontra regra serka sanitária, tersa (04/04/21). Imajen Tatoli/António Gonçalves.

DILI, 06 maiu 2021 (TATOLI)—Polísia Nasionál Timor Leste (PNTL), liu hosi Polísia Nasionál Serbisu Investigasaun Kriminál (PNSIK), prosesa ona Timoroan na’in 96, ne’ebé dezobediénsia ba regra Sersa Sanitária (SS), ba Ministériu Públiku (MP).

Abitante hirak-ne’e, PNTL detein iha kapitál Dili tanba konsidera dezobediénsia, lakohi koopera ho PNTL hodi kumpre regra Serka Sanitária, ne’ebé Komandu PNTL sosializa no implemeta iha terrenu.

Notísia relevante:PNTL investiga membru-abitante ne’ebé partisipa festa Colmera

“Durante semana ne’e, PNSIK indentifika ema na’in 95 ho tipu kazu dezobediénsia, lakohi kumpre regra Estadu Emerjénsia. Sira-nia prosesu kazu, lori ona ba Ministériu Públiku,” dehan Portavós PNTL, Superintendente Xefe, Arnaldo de Araújo ba jornalista iha Komandu PNTL, Caicoli, Dili.

Entretantu, espésie no kategoria dezobediénsia ba regra Serka Sanitária ne’e mak hanesan, balun la uza máskara, balun hetan detensaun tanba halibur-malu grupu no konsumu alkól iha tasi-ibun, no maioria movimentu ho objetivu ne’ebé la klaru.

Iha loron 29 abríl 2021, Konsellu Ministru aprova ho alterasaun projetu Rezolusaun Governu ba impozisaun konfinamentu domisiliáriu jerál ba ema hotu-hotu ne’ebé hela iha Munisípiu Dili, tenke hela iha uma ka iha alojamentu temporáriu, hahú hosi tuku 00:00 loron 30 abríl, to’o tuku 23:59 loron 13 maiu, 2021.

Rezolusaun Governu kona-bá impozisaun konfinamentu domisiliáriu jerál, sita mós katak, autoridade polisiál fiskaliza kumprimentu ba regra ne’ebé hatuur ona iha Rezolusaun ne’e, aviza infratór-sira bainhira la kumpre Rezolusaun ne’e, konsidera prátika krime dezobediénsia.

Autoridade polisiál sei komunika ba Ministériu Públiku kona-bá identidade hosi ema ne’ebé, hafoin avizu ne’ebé prevee iha fraze anteriór no kontinua la respeita regra ne’ebé prevee ona iha Rezolusaun Governu.

Bainhira ema hosi estranjeiru la respeita  regra-sira ne’ebé prevee iha Rezolusaun Governu ne’e, autoridade polisiál sei komunika sira-nia identidade ba Serbisu Migrasaun.

Rezolusaun ne’e mós bandu movimentu transporte públiku iha área-sira hotu iha Munisípiu Dili, liuliu, mikrolete, taxi no anguna.

Bandu atividade relijioza ne’ebé implika ezisténsia ema halibur-malu. Ba efeitu Rezolusaun Governu ne’e, konsideradu nu’udár ema halibur-malu  liu hosi na’in-rua, tenke iha distánsia fízika menus hosi metru rua.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here