Ekipa médiku kontinua halo teste swab. Imajen Tatoli/Egas Cristóvão.

DILI, 07 maiu 2021 (TATOLI)—Sekretária Meza Parlamentu Nasionál, Deputada Lídia Norberta dos Santos Martins, fó-sai katak funsionáriu na’in-14 hosi Parlamentu Nasionál pozitivu COVID-19, tanba ne’e seguransa sivíl sira sei monitoriza ho rigorozu asesu públiku ba uma fukun.

Notísia Relevante: Deputadu no funsionáriu PN submete teste swab daruak

“Parlamentu Nasionál mós iha ona cluster ida iha-ne’e, tanba teste swab dahuluk ne’e iha ida de’it mak pozitivu maibé teste swab daruak ne’e rezultadu horisehik sai ne’e ema na’in-11, agora daudaun ita simu tán tolu (3) tan hamutuk 14,” Deputada Lídia informa liuhosi konferénsia imprensa, hafoin reuniaun líder bankada, iha Parlamentu Nasionál, sesta ne’e.

Lista funsionáriu ne’ebé hetan pozitivu COVID-19 komposta hosi kuadru na’in-lima, prestadór serbisu seluk ne’e hamutuk na’in-haat (4), seguransa na’in-ida (1) no motorista na’in-tolu (3).

Sekretária Meza PN fó-sai númeru kazu COVID-19 bazea ba informasaun ne’ebé rekomenda hosi Sentru Integradu ba Jestaun Krize (CIGC-sigla portugés).

Maske deputadu sira la hetan pozitivu maibé motrorista hosi deputadu balun ninia rezultadu teste swab ne’e pozitivu COVID-19.

Deputadu Lídia akresenta, ho cluster foun ida iha uma fukun ne’e entaun sei kontrolu ho rigorozu asesu públiku nian ba Parlamentu Nasionál.

Regra sira-ne’ebé presiza halo-tuir mak tama Parlamentu Nasionál presiza kumpre protokolu COVID-19 nian hanesan uza maskára ho loloos no kumpre distansiamentu sosiál.

“Agora seguransa sivíl sira mak sei kontrola, sé mak mai iha parlamentu uza maskára ho loloos. Tanba únika solusaun ba ita mak ne’e, ita tenke haktuir protokolu saúde nian no ita buka moris mós ho COVID-19 ne’e,” nia dehan.

Sekretária Meza PN ne’e hateten, kona-ba senáriu aat karik mosu, posibilidade reuniaun sira ho zoom de’it semana ida dala-ida.

Nia fó-sai katak, hosi parte sekretariadu Parlamentu Nasionál nian hamosu rotasaun ba funsionáriu sira iha pandemia ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here