Ekipa médiku kontinua halo teste swab. Imajen Tatoli/Egas Cristóvão.

DILI, 04 maiu 2021 (TATOLI)—Deputadu no funsionáriu sira iha Parlamentu Nasionál (PN), tersa ne’e submete ba teste swab daruak nian tanba saúde públika iha vijénsia COVID-19 ne’e perigozu.

Notísia Relevante: Rezultadu teste swab iha PN maioria negativu

“Ohin, funsionáriu, seguransa, motorista no deputadu sira submete ba teste swab daruak nian tanba ema balun hosi parlamentu pozitivu ona iha semana kotuk no oras ne’e iha izolamentu,” Sekretária Meza Parlamentu Nasionál, Deputada Lídia Norberta dos Santos Martins, informa ba jornalista sira, iha resintu uma fukun.

Deputadu Lídia fó-sai katak, ohin, la realiza plenária tanba deputadu sira submete ba teste swab daruak nian hodi halo prevensaun ba COVID-19.

“Ami hanesan reprezentante povu halo servisu barak entaun iha semana kotuk komisaun sira hala’o audiénsia públika ho ministériu balun sira-nia funsionáriu balun hetan pozitivu COVID-19, tanba ne’e mak ohin ami tuir fali teste swab ne’e,” nia dehan.

Deputada Lídia kestiona maneira Sentru Integradu ba Jestaun Krize (CIGC-sigla portugés) nian tanba la telefone direta ema-ne’ebé pozitivu ne’e hafoin halo teste.

“Só ami (PN) deteta no maluk ne’ebé pozitivu ne’e ba entrega nia-aan katak nia pozitivu. Ami rekomenda ba CIGC kuandu iha rezultadu pozitivu hosi instituisaun nia funsionáriu ruma, labele kompila fali rezultadu ne’e iha de’it CICG, tenke telefone kedas ema ida pozitivu ne’e atu labele fó risku ba ema seluk,” nia lamenta.

Tanba, tuir nia, funsionáriu ida foin lalais pozitivu ne’e husik la’o livre etaun bele provoka númeru kazu kontinua aumenta.

“Nia la hatene buat ida, nia hanoin buat hotu-hotu di’ak entaun nia la’o ba-mai loron ida tomak. Ami mak deteta liuhosi lista ne’ebé informa hosi CIGC,” nia dehan.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here