Médiku-sira halo teste swab ba komunidade iha Sentru Formasaun Polísia Comoro (CFP), tersa (04/05/21). Imajen Tatoli/António Gonçalves.

DILI, 06 maiu 2021 (TATOLI)—Sala Situasaun Sentru Integradu Jestaun Krize (SIJK) rejista kazu pozitivu COVID-19  hamutuk 84 , rekoperadu 81 no kazu ativu 1.417.

“Totál kazu konfirmadu kumulativu sura hosi 21 marsu 2020, hamutuk 2.870. Pozitivu ohin-nian 84 kompostu hosi 65 iha Dili no munisípiu seluk 19. Totál kazu ativu 1.417,’’ Koordenadór Forsa-Tarefa ba Prevensaun no Mitigasaun, Rui Maria de Araújo hateten liu hosi komunikadu, kinta ne’e.

Notísia relevante:COVID-19: pozitivu 133, rekoperadu 34 no ativu 1.414

Husi totál kazu detetadu foun ohin mane 54 no feto 30, sira ne’ebé idade 12 na’in-tolu. Entre tinan 12-59 na’in 80 (95,2%), idade 60 na’in-ida.

Hosi horisehik mai ohin, hamutuk hotu Laboratóriu Nasionál Saúde halo 1.102 testes PCR, ho detalla hanesan tuir-mai, Vijilánsia sentinela 53, Rastreiu ba kontaktu ka Contact tracing 94, Rastreiu Aleatoriu ka Random Screening 116, viajen sai hosi serka sanitária Munisipiu Dili 483, Viajen internasionál 45, Follow up iha kuarentena 44.

Totál teste PCR ne’ebé halo horisehik  iha Munisípiu sira seluk hamutuk 336, ho detalla hanesan tuir-mai, Baucau 152, Maliana 15, Maubisse 136,  Suai 33, Ermera laiha,  Viqueque laiha no RAEOA laiha.

Tabela evolusaun surtu COVID-19 iha TL hosi 21 marsu 2020 to’o 6 maiu 2021, Aileu ualu, totál kumulativu kazu rekuperadu ida,  totál kazu ativu ohin hitu kazu esporadiku, Ainaro 22, kazu rekoperadu rua,  kazu ativu ohin 20  kazu esporadiku.

Baucau 148, totál kazu iha oras 24 iha 18, kazu rekoperadu 24, total kazu ativu ohin 124  kazu  iha cluster. Bobonaro 17, kazu rekoperadu  ualu, ativu ohin sia kazu esporadiku.

Covalima 54, totál kazu iha oras 24 ida, rekoperadu 18, kazu ativu ohin 36 kazu iha cluster. Dili 2.451, totál kazu oras 24 iha 65, kazu rekuperadu 1.323, kazu ohin 1.124 totál kumulativu óbitu haat kazu iha transmisaun komunitária.

Ermera 49, kazu rekoperadu 12,  ativu ohin 37 kazu iha cluster. Lautém 22, rekoperadu tolu, ativu 19 kazu esporadiku.

Liquiça 15, rekoperadu sia, ativu neen kazu esporadiku. Manatuto neen, rekoperadu  ida, ativu lima  kazu esporadiku. 

Manufahi 52, kazu rekoperadu 35, kazu ativu ohin 17 kazu iha cluster. RAEOA  hitu, rekoperadu haat, ativu  tolu  kazu esporádiku. Viqueque 19, rekoperadu sia, ativu ohin 10 kazu iha cluster.

Evolusaun surtu COVID-19 iha Munisípiu Dili no Munisípiu sira seluk no mós RAEOA, atu bele hatene surtu ida ninia evolusaun, no mós surtu ne’e aumenta ka diminui, indikadór ida ne’ebé matenek-na’in epidemiolojia nian uza, maka insidénsia.

Konvensionalmente insidénsia sukat totál kazu foun, kada loron, pur abitante rihun 100, no hatudu risku ne’ebé populasaun iha atu hetan da’et moras ida.

Hatudu kazu detetadu foun kada loron iha Timor-Leste tomak. Ba ohin loron, hosi insidénsia COVID-19 iha Timor-Leste durante loron hitu ikus mak 6,6/abitante rihu 100, enkuantu ba de’it Munisípiu Dili ohin loron nian 22,5/abitante rihun 100. 

Insidénsia iha leten sei nafatin hatudu katak, Munisípiu Dili mak fatin ho risku bo’ot liu atu populasaun hetan da’et no hada’et tutuan virus SARS-CoV-2.

Iha loron 6 maiu 2021, izolamentu Vera Cruz halo tratamentu ba kazu detetadu na’in 33. Iha área obstetrisia na’in 11,  medisina interna na’in 17, pediatria na’in-lima. 

Sira na’in 11 iha obstetrisia, kategoria moderadu hotu, sira-nia kondisaun estável. Ida maka ho gravidez 42 semanas, maibé iha kondisaun ‘Intrauterine Fetal Death-IUFD’. Médiku espesialista-sira fó hela asisténsia espesializada.  

Sira na’in 17 iha medisina interna, haat grave uza hotu oksijéniu, na’in 13 moderadu.  Hosi kazu lima  pediatria, haat moderadu, ida  grave. Na’in-ida grave uza CPAP, no haat  moderadu la uza ona oxijéniu.

Aproveita informa ba públiku katak, hahú ohin ba oin, autoridade saúde deside ona atu adopta rekomendasaun OMS nian relasiona ho kritériu atu fó alta/deklara kazu detetadu ida rekoperadu ona, ka seidauk.

Kritériu ne’ebé aplika iha fatin ho transmisaun komunitária hanesan iha Munisípiu Dili maka loron 10 hafoin teste PCR pozitivu ka hafoin mosu sintomas, plus loron tolu tan, bele ona alta.

Ida ne’e signifika, hafoin ema ida hetan pozitivu iha ninia teste PCR, ka hafoin ema ne’e hahú sente iha sintomas, liu tiha loron 13, nia bele ona alta hosi izolamentu ka bele konsidera nu’udár rekoperadu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here