Komunidade partisipa swab teste iha sede suku Caikoli, sesta (07/05/21). Imajen Tatoli/António Gonçalves.

DILI, 07 maiu 2021 (TATOLI)—Abitante iha aldeia Divino 12, suku Caicoli, postu adminstrativu Vera Cruz, munisípiu Dili, koopera tebes ho ekipa saúde hosi Pilar III vizilánsia epidemiolojia, hodi halo teste swab obrigatóriu, sesta ne’e.

Kooperasaun di’ak ne’e, tanba serbisu hamutuk entre autoridade lokál iha suku ne’e, hodi halo sensibilizasaun iha suku tomak, durante loron rua.

Notísia relevante:Kazu pozitivu COVID-19 aumenta, Governu deside halo teste swab masal

Xefe suku Caicoli, Hipólito Marques Sarmento, hateten sosializasaun ne’e hahú hosi 06 to’o 07 maiu, autoridade lokál konsege konvense abitante-sira, no ohin aldeia tomak partisipa iha teste swab obrigatóriu, hodi prevene surtu COVID-19.

“Dezde desizaun ne’e fó-sai, ami tun kedan ba terrenu hodi fó hanoin ba komunidade katak, presija duni no importante tebes atu iha teste swab. Ohin, hau-nia komunidade kolabora tebes,’’ Hipólito Marques Sarmento, hateten ba jornalista-sira iha sede suku Caicoli, sesta ne’e.

Tanba ne’e, durante loron tomak, ekipa saúde konsege halo teste swab ba ema hamutuk 367, hosi aldeia Divino 12.

Suku Caicoli iha aldeia lima mak hanesan, aldeia Sentru da Unidade, Divino 12, Foho Rai Boot,  05 Tahu Laran, no Sacoco  ho totál populasaun hamutuk 5.971. 

Entretantu, Governu liu hosi reuniaun Konsellu Ministru (KM) iha kuarta 05 maiu 2021, aprova ona projetu Dekretu Governu ba alterasaun dahuluk ba Dekretu Governu númeru 14/2021 loron 29 abríl, kona-bá medida ezekusaun deklarasaun Estadu emerjénsia, ne’ebé efetua hosi Dekretu Prezidente Repúblika númeru 24/2021, loron 28 abríl.

Ho alterasaun ida-ne’e individu hotu-hotu iha territóriu nasionál ne’ebé abranje hosi operasaun-sira testájen masal ka aleatória, tuir kritériu-sira ne’ebé define hosi autoridade saúde, obrigadu atu realiza ezame médiku ba diagnóstiku COVID-19, ka infesaun hosi SARS-CoV-2.

Dekretu Governu ne’e mós mensiona katak, abitante ne’ebé rekuza hodi realiza ezame médiku hosi diagnóstika obrigatóriu, sein prejuizu responsabilidade kriminál, sujeita ba izolamentu profilátiku obrigatóriu, iha estabelesimentu saúde, rezidénsia ka iha sentru izolamentu ne’ebé estabelese ba efeitu hosi Estadu.

Iha kazu ida-ne’e, despeza ne’ebé iha relasaun ho izolamentu profilátiku-nian, individu rasik maka selu.

Alende ne’e, sita mós kona-bá, sidadaun hotu-hotu nasionál ka estranjeiru ne’ebé hakarak tama iha territóriu nasionál, tenke hala’o uluk pedidu autorizasaun prévia.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here