Vasina AstraZeneca ne’ebé uza iha Dili. Imajen Tatoli/António Gonçalves.

DILI, 06 maiu 2021 (TATOLI)—Vise Koordenadora Jerál Komisaun Nasionál ba Prevensaun COVID-19, Ministériu Saúde (MS), Odete da Silva Viegas, hateten vasina AstraZeneca doses dahuluk ne’ebé ho doses rihun 24, sei bele utiliza to’o 31 fulan maiu, tinan ne’e.

“Prazu sei hotu iha 31 maiu. Tanba ne’e, sei iha tempu atu bele rai vial balun ne’ebé sei iha, no ita bele utiliza hamutuk ho doses hirak ne’ebé oferese hosi Austrália iha 10 maiu,’’ Odete da Silva Viegas, hateten ba jornalista-sira iha otél Novo Turizmu, kinta ne’e.

Notísia relevante:Ema hamutuk 28.678 simu ona vasina AstraZeneca

Maski la temi kuantidade, maibé nia dehan iha vial balun ne’ebé sei iha no sei oferese ba liña frente-sira, ne’ebé serbisu iha kuarentena no izolamentu.

“Ida ne’e mós la’ós númeru ne’ebé boot, maibé iha ema na’in 50-resin. Ita seidauk fó tanba sira iha hela faze izolamentu no bainhira sira sai hosi ona, sei halo teste tan. La signifika doses rihun 24 halo hotu, ita utrapasa ona tarjetu ne’ebé ita hakarak atinji,’’ Odete esplika.

Tuir dadus hosi MS katak, nível nasionál simu ona vasina hamutuk 28.678, liña frente iha Munisípiu hotu-hotu kuaze 100 %.

Nia mós atualiza katak, ema-sira ne’ebé durante ne’e vasina iha primeira faze, hetan reasaun hamutuk ema na’in 11.

Hosi na’in 11 ne’e, ida moderadu no ida grave, sia seluk reasaun isin-manas hanesan baibain. Ida grave ne’e tanba reasaun alérjiku no profisionál saúde lori ba Ospitál atende ho oxijéniu ikus-mai rekopera ona, inklui ida ne’ebé moderadu.

“Tanba ne’e, doses dahuluk ne’e la’o ho susesu, maski ema balun complain ne’e normál,” nia deklara.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here