DILI, 06 maiu 2021 (TATOLI)—Polísia Nasionál Timor-Leste (PNTL), orienta ona Polísia Nasionál Serbisu Investigasaun Kriminál (PNSIK), atu halo mós investigasaun profunda ba pesoál polísia ho abitante ne’ebé partisipa serimónia anivérsariu, iha Colmera, Dili (02/05/21).
Portavóz Komandu Jerál PNTL, Superintendente Xefe, Arnaldo de Araújo, hateten tuir loloos PNTL Dili halo kedan asaun detensaun fragrante delito (kaer iha fatin akontesimentu), maibé tanba ema barak, PNTL halo de’it aprosimasaun ho festa nai’n hodi hapara kedan festa iha momentu ne’ebá, no bolu ona na’in ba festa hodi presta deklarasaun iha PNSIK.
Notísia relevante:Festa na’in iha Colmera presta deklarasaun ba PNSIK
“Ita bele halo detensaun iha momentu atuasaun ho flagrante delito. Ita mós bele halo identifikasaun, tanba polísia uza maneira no tátika, nune’e ita bolu ona na’in ba festa ho-nia oan mane mai presta ona deklarasaun,” Arnaldo de Araújo hateten ba jornalista-sira iha Komandu Jerál PNTL, Caicoli, kinta ne’e.
Kona-bá pesoál polísia ne’ebé partisipa direta iha festa, PNTL sei investiga no fó sansaun tuir lei disiplinár PNTL.
“Polísia indentifika no sei bolu hotu ema sira ne’ebé partisipa festa, sei investiga hotu inklui membru polísia ita sei prosesa tuir regra disiplinár PNTL,” nia subliña.
Entretantu, PNTL, liu hosi PNSIK, bolu ona, Clara Pereira nu’udár uma-na’in iha Colmera, iha (04/05) hodi presta deklarasaun kona-bá selebrasaun aniversáriu ne’ebé foin lalais virál iha média sosiál.
Imajen kona-bá selebrasaun festa aniversáriu ida iha rezidénsia ida iha área Colmera, hahú espalla iha média sosiál, iha segunda (03/05/21).
Iha loron 29 abríl 2021, Konsellu Ministru aprova, ho alterasaun, projetu Rezolusaun Governu ba impozisaun konfinamentu domisiliáriu jerál ba ema hotu-hotu ne’ebé hela iha Munisípiu Dili, tenke hela iha uma ka iha alojamentu temporáriu, hahú hosi tuku 00:00 loron 30 abríl to’o tuku 23:59 loron 13 maiu, 2021.
Rezolusaun Governu kona-bá impozisaun konfinamentu domisiliáriu jerál, sita mós katak, autoridade polisiál fiskaliza kumprimentu ba regra ne’ebé hatuur ona iha Rezolusaun ne’e, aviza infratór-sira bainhira la kumpre Rezolusaun ne’e, konsidera prátika krime dezobediénsia.
Autoridade polisiál sei komunika ba Ministériu Públiku kona-bá identidade hosi ema ne’ebé, hafoin avizu ne’ebé prevee iha fraze anteriór no kontinua la respeita regra ne’ebé prevee ona iha Rezolusaun Governu.
Bainhira ema hosi estranjeiru la respeita regra-sira ne’ebé prevee iha Rezolusaun Governu ne’e, autoridade polisiál sei komunika sira-nia identidade ba Serbisu Migrasaun.
Rezolusaun ne’e mós bandu movimentu transporte públiku iha área-sira hotu iha Munisípiu Dili, liuliu, mikrolete, taxi no anguna.
Bandu atividade relijioza ne’ebé implika ezisténsia ema halibur-malu. Ba efeitu Rezolusaun Governu ne’e, konsidera nu’udár ema halibur-malu liu hosi na’in-rua, tenke iha distánsia fízika menus hosi metru rua.
Jornalista: Eugénio Pereira
Editór: Cipriano Colo