Ekipa Saúde na Familia (SnF) kontinua hala’o Sentinela Ativa ka Active Case Finding, iha sede suku Caicoli, Munisípiu Dili, sesta (07/05/21). Imajen Tatoli/António Gonçalves.

DILI, 06 maiu 2021 (TATOLI)—Reprezentante povu iha uma fukun Parlamentu Nasionál (PN) sei diskute no halo aprovasaun ba projetu-rezolusaun ida hodi fó rekuñesimentu ba serbisu profisionál saúde sira iha vijénsia COVID-19.

Notísia Relevante: AETL-AMTL husu PN kria lei asegura serbisu profisionál saúde sira

Prezidente Komisaun F ne’ebé trata asuntu saúdé, Deputadu Noé da Silva Marçal ‘Buka-Tuir’, simu ona preokupasaun hosi Profisionál Saúde sira no sei konsidera iha relatóriu no paresér.

“Sira-nia ezijénsia ne’e haree liubá akontesimentu foin lalais akontese iha Suai no mós Laulara, tanba sidadaun balun la ho responsabilidade halo agresaun fíziku hasoru ita-nia médiku sira. Iha loron segunda, semana oin, ami sei halo rezolusaun ida hodi fó votu saudasaun ba sira no mós fó rekuñesimentu ba sira-nia serbisu iha vijénsia COVID-19,” Deputadu Noé da Silva Marçal informa ba jornalista sira, iha resintu Parlamentu Nasionál, kinta ne’e.

Prezidente Komisaun F ne’e fó-sai katak, projetu-rezolusaun ne’e atu fó motivasaun ba sidadaun sira atubele respeita autoridade sira iha Ministériu Saúde no mós profisionál saúde sira iha liña frente ba COVID-19.

Nia dehan, situasaun atuál defísil tebes maibé profisionál saúde sira kontinua dedika-aan iha vijénsia COVID-19 entaun parlamentu nu’udar órgaun soberania ida-ne’ebé reprezenta povu presiza fó valorizasaun atu Timor-oan hotu bele respeita.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here