Asosiasaun Enfermeiru Timor-Leste (AETL) no Asosiasaun Médiku Timor-Leste (AMTL), ko’alia ho jornalista sira hafoin halo audisaun ho Prezidente Parlamentu Nasionál, Deputadu Aniceto Longuinhos Guterres Lopes no Komisaun F kona-ba situasaun profisionál saúde sira enfrenta iha vijénsia COVID-19. Imajen TATOLI/Evaristo Soares Martins.

DILI, 05 maiu 2021 (TATOLI)—Asosiasaun Enfermeiru Timor-Leste (AETL) no Asosiasaun Médiku Timor-Leste (AMTL) husu Parlamentu Nasionál nu’udar órgaun soberania ne’ebé reprezenta povu, hamosu lei ida hodi regulariza profisionál saúde sira tanba durante vijénsia COVID-19 enfrenta kazu agresaun fíziku iha terrenu.

Prezidente AETL, José Dionísio Ximenes, hateten durante ne’e profisionál saúde sira enfrenta agresaun fizika no intimidasaun oinoin. Tanba ne’e Parlamentu Nasionál hanesan órgaun soberania ne’ebé reprezenta povu, bele konsidera no foti medida ruma ba situasaun atuál.

“Ami asosiasaun profisionál saúde mai halo enkontru ho Prezidente Parlamentu Nasionál no Komisaun F kona-ba akontesimentu iha Suai, hanesan agresaun fiziku ba ami-nia membru, tanba ne’e ami hato’o karta ba Parlamentu Nasionál. Ami rekomeda atu parlamentu halo lei ida ka orden ruma ba ami,” Prezidente AETL, José Dionísio Ximenes, informa ba jornalista hafoin termina audiénsia.

Asosiasaun sira hosi Profisionál Saúde halo audiénsia ho Prezidente Parlamentu Nasionál, Deputadu Aniceto Longuinhos Guterres Lopes, akompaña hosi Prezidente Komisaun F ho nia membru sira iha sala Grupu Feto Parlamentár Timor-Leste (GMPTL-sigla portugés), Parlamentu Nasionál, kuarta ne’e.

Durante audiénsia, Profisional Saúde sira komposta hosi Asosiasaun Médiku Timor-Leste (AMTL) no Asosiasau Enfermeiru Timor-Leste(AETL) aprezenta kazu ne’ebé  médiku sira hasoru iha kazu agresaun fíziku iha Suai, Munisípiu Covalima iha loron 19 abril no loron 21 abril kontinua mosu Laulara, Munisípiu Aileu.

Nia dehan, lei mak bele regula no kria kondisaun ba profisionál saúde hala’o  servisu ho seguru iha vijénsia pandemia COVID-19 ne’e.

Nunee mós, Prezidente Asosiasaun Médiku Timor-Leste Andre Monteiro, esplika Konstituisaun RDTL iha artigu 57 garante, lei sistema nasionál saúde no lei organiku sira la’o ona maibé husu atu kria tán lei ka orden ba profisional saúde sira hotu.

“Ami mai hato’o ba Prezidente Parlamentu Nasionál ho deputadu sira hotu, atubele haree oinsá buka atu aselara lalais lei ne’e hodi fó protesaun ba pesoál saúde sira bainhira hala’o sira-nia kna’ar iha terenu,” nia katak.

Entretantu Prezidente Parlamentu Nasionál, Deputadu Aniceto Longuinhos Guterres Lopes, fó orientasaun ba Komisaun F ne’ebé asuntu saúde atu prepara relatóriu no paresér ida aprezenta ba plenária hodi halo diskusaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here