Kondisaun Sentru Izolamentu Ospitál Lahane, tersa (02/03). Imajen Tatoli/António Gonçalves.

DILI, 06 maiu 2021 (TATOLI)—Ministériu Saúde (MS) liu hosi Diresaun Rekursu Umanu, urjentemente loke vaga hamutuk 116, atu fó apoiu ba atendimentu pasiente COVID-19 iha sala izolamentu Vera Cruz no antiga Ospitál Lahane.

Vaga 116 ne’e kompostu hosi farmasista na’in 24, analista 24, radiolojista 24, pesoál lojístika 24 no pesoál limpeza 20.

Notísia relevante:Governu transforma ona kuarentena lima ba izolamentu

“Vaga ne’ebé ami loke ba públiku urjente, atu bele apoia serbisu iha izolamentu Vera Cruz no Lahane. Kona-bá enfarmázen, parteira no médiku, ami kontrata hotu ona. Maibé, ita mós prepara funsionáriu-sira  tanba balun pozitivu COVID-19, entaun ida-ne’e iha tendénsia presija nafatin rekursu hodi substitui,’’ Diretora Rekursu Umanu, MS, Tomásia de Sousa, hateten ba jornalista Agência Tatoli iha nia kna’ar fatin, kinta ne’e.

Tuir planu, kada sentru izolamentu sei koloka ekipa hamutuk na’in 12, kompostu hosi pesoál limpeza, médiku, enfermeiru, tékniku laboratóriu, tékniku analista no radiolojista.

“Signifika, sira tama ekipa izolamentu ne’e tenki serbisu loron 14. Entaun, bainhira sira sai, ekipa seluk tenke tama fali. Ita sei forma ekipa haat atu troka-malu durante fulan ida,” nia esplika.

Iha planu ne’e mós, parte Ministériu sei halo formasaun ba pesoál ne’ebé rekrutadu, kona-bá mekanizmu atendimentu iha izolamentu no kandidatu sira tenke prienxe duni kritéria.

“Maski serka sanitária, maibé presija diploma no kartaun profisionál, ida ne’e esensiál tebes. Maski rekezitu todan oitoan hosi Komisaun Funsaun Publika, maibé ida-ne’e serbisu profisionál,’’nia subliña.

Diretora rekursu umanu ne’e rekoñese katak, ho rekrutamnetu ne’ebé iha, rekursu umanu seidauk sufisiente nafatin iha parte serbisu saúde, no hein katak, ho prezensa bolseiru hosi Cuba na’in 17 ne’ebé fila ona mai Timor, bele fó asisténsia iha situasaun COVID-19, liu-liu iha izolamentu Vera Cruz no Lahane.

Maski la temi detalla kona-bá totál orsamentu alokadu, maibé, Tomásia dehan, rekrutamentu ne’e halo tanba MS prevee ona osan iha Orsamentu Jerál Estadu (OJE) 2021, ba rekrutamentu internatu, kontratu regulár no mós permanente.

Alende ne’e, orsamentu COVID-19 mós prevee atu halo kontratu ba pesoál ne’ebé serbisu no apoia ba pasiente COVID-19, maibé la’o nafatin tuir prosedimentu  ne’ebé iha.

Rekrutamentu ida-ne’e, loke ba públiku durante semana ida, hahú ona iha segunda to’o iha sesta (03-07 maiu), ekipa painél sei halo selesaun no avaliasaun ba dokumentu bazeia ba rekezitu ne’ebé iha.

Oras ne’e daudaun, sentru izolamentu ativu iha Dili mak hanesan, Tasi-tolu block A,B,C, otél Novo Horizonte, SK Hotel iha Metiaut, Hotel Fortuna,  otél Leokase iha Rai-kotu, otél Eternity iha Fatuhada, antiga Ospitál Lahane, Tibar, Vera Cruz no ida iha munisípiu Manatuto.

To’o horisehik (05/05), Sala Situasaun Sentru Integradu Jestaun Krize (SIJK), rejista kazu pozitivu COVID-19 hamutuk 133, rekoperadu 34 no ativu 1.414.

Jornalista: Felicidade Ximenes

Editór: Cipriano Colo

1 KOMENTÁRIU

HAKEREK NO HATÁN

Please enter your comment!
Please enter your name here