Otél Novo Horizonte, Dili. Imajen Tatoli/Cipriano Colo.

DILI, 05 maiu 2021 (TATOLI)—Governu transforma ona fatin kuarentena lima ba sentru izolamentu hodi izola pasiente COVID-19, ne’ebé oras-ne’e númeru aumenta makaas.

Kuarentena lima ne’ebé transformadu ba izolamentu mak hanesan, block C Tasi-tolu,  otél Novo Horizonte,  SK Hotel iha Metiaut, Hotel Fortuna, no otél Leokase iha Rai-kotu.

Notísia relevante:MS prepara-tan fatin neen ba izolamentu pasiente COVID-19

Diretór Jerál Serbisu Kooperativu, Minsitériu Saúde, Marcelo Amaral, informa Governu iha ona akordu atu bele utiliza mós Golgota mall ba izolamentu iha semana oin.

Alende ne’e, Governu iha hela prosesu reabilitasaun ba edifísiu eskola EBC primeiru no segundu síklu Bairru Formoza (SD Xina), ho edifísiu Eskola Téknika Vokasionál (STM sígla Indonézia) Becora, ne’ebé sei uza mós ba izolamentu.

“Ita haree kazu aumenta bebeik, presiza aumenta izolamentu. Maibé, planu tuir-mai ita haree kazu sira  ne’ebé kamán no laiha síntoma, ita esforsu atu idaidak izola an de’it iha nia-uma, depois mak ita aplika disiplina ba implementasaun protokolu saúde. Kazu sira moderadu grave mak ita lori ba izolamentu atu hetan atendimentu másimu,’’ Marcelo Amaral hateten ba jornalista Agência Tatoli, iha kna’ar fatin, kuarta ne’e.

Kona-bá uma retiru Padre sira-nian iha Dare, Governu la konsegue konklui negosiasaun, tanba  fatin  ne’e sei iha prosesu reabilitasaun ne’ebé Padre-sira sei uza ba formasaun.

Oras ne’e daudaun, sentru izolamentu ativu iha Dili mak hanesan, Tasi-tolu block A,B,C, otél Novo Horizonte, SK Hotel iha Metiaut, Hotel Fortuna,  otél Leokase iha Rai-kotu, otél Eternity iha Fatuhada, antiga Ospitál Lahane, Tibar, Vera Cruz no Luz Clarita.

To’o ohin, Sala Situasaun Sentru Integradu Jestaun Krize (SIJK), rejista kazu pozitivu COVID-19 hamutuk 133, rekoperadu 34 no ativu 1.414.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here