Membru PNTL hala’o teste swab iha Komandu Jerál PNTL, Caicoli, kinta (06/05/21. Imajen Tatoli/Eugénio Pereira.

DILI, 06 maiu 2021 (TATOLI)—Komandante Jerál, Polísia Nasionál Timor Leste (PNTL), Komisáriu Polisia, Faustino da Costa, orienta ona membru hosi unidade hotu-hotu atu halo teste swab.

Orientasaun ne’e Komandu foti, tanba hakarak evita númeru COVID-19 labele alastra ba membru-sira ne’ebé hanesan mós liña frente iha prevensaun surtu ne’e.

Notísia relevante:Falur ho membru komponente navál 498 simu vasina

Portavóz Komandu Jerál PNTL, Superintendente Xefe, Arnaldo de Araújo, hateten membru PNTL nu’udár ekipa forsa liña frente ne’ebé implementa lei no ajuda Ministériu Saúde (MS) iha sosializaun regra prevensaun COVID-19, nune’e hotu-hotu tenki tuir teste swab nu’udár ezemplu di’ak ba populasaun iha territóriu.

Tanba ne’e, ohin, ekipa saúde PNTL hamutuk ho ekipa Pilár III MS, realiza teste swab ba membru hosi Unidade Espesiál Polísia (UEP).

“Membru PNTL, F-FDTL no komunidade, ita hotu-hotu iha obrigasaun tuir teste swab. Tanba PNTL mak lor-loron hasoru komunidade. Ita hadomi ita-nia an no ita-nia família,” Arnaldo de Araújo, hateten ba jornalista-sira iha Komandu Jerál PNTL, Caicoli, Dili, kinta ne’e.

Arnaldo dehan, bainhira iha rezultadu hatudu katak, membru balun pozitivu, Komandu sei fasilita hodi submete ba izolamentu ne’ebé Governu prepara ona.

“Bainhira ita pozitivu, ita tenke ba hela iha izolamentu ka konfinamentu mesak ne’ebé tenki prienxe rekezitu hosi MS,” nia subliña.

Entretantu, iha 30 abríl 2021, Komisáriu Polísia, Faustino da Costa, Segundu Komandante, Komisáriu Polísia, Mateus de Jesus ho ofisiál Superiór PNTL, hala’o ona teste swab iha Komandu Jerál, Caicoli.

Rezultadu hosi teste swab ne’e, asesór internasionál ida hanesan mós membru Guarda Nacional Repubica (GNR) Portugál, iha Gabinete Komandu Jerál, pozitivu COVID-19.

Oras-ne’e daudaun, Komandu PNTL koordena ona ho ekipa MS fó hela asiténsia saúde ba assesór ne’e iha  izolamentu ba rekoperasaun saúde.

Entretantu, unidade sira ne’ebé sei tuir teste swab mak hanesan, Unidade Espesiál Polísia (UEP), Unidade Batalliaun Orden Públika (BOP), Korpu Seguransa Pesoál (CSP), Unidae Patrullamentu Fronteira (UPF), Unidade Polísia Marítima (UPM), Unidade Tránzitu, Polísia Serbisu Investigasaun Kriminál (PNSIK), Polísia Komunitária, Relasaun Públika, Relasaun Internasionál, Administrasaun, Sentru Formasaun Polísia (CFP), Deprtamentu Justisa, Jéneru PNTL, Aprovizionamentu no Rekursu Umanu.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here