Vise Xefe Estadu Maiór Jenerál FALINTIL Forsa Defeza Timor Leste (F-FDTL), Majór Jenerál, Falur Rate Laek simu vasina AstraZeneca, iha Hera, kuarta (21/04/21). Imajen Tatoli/Felicidade Ximenes.

DILI, 21 abríl 2021 (TATOLI)—Vise Xefe Estadu Maiór Jenerál FALINTIL Forsa Defeza Timor Leste (F-FDTL), Majór Jenerál, Falur Rate Laek  hamutuk ho membru hosi Komponente Navál na’in 498, ohin simu vasina AstraZeneca, iha Hera.

Hafoin simu vasina, Falur sente di’ak hela, no enkoraja membru-sira iha komponente ne’e atu hotu-hotu partisipa, tanba AstraZeneca di’ak ba saúde perante surtu COVID-19.

Notísia relevante:Vasina, Falur husu membru F-FDTL koopera ho ekipa saúde

“Ha’u sente di’ak hela, no orsida kalan mak ita haree took ninia reasaun,” Majór Jenerál, Falur Rate Laek, hateten ba jornalista-sira iha Hera, kuarta ne’e.

Majór Jenerál ne’e mós subliña katak, obrigatóriamente membru-sira tenke simu hotu vasina tanba, sira mós tama iha liña frente hodi kumpri missaun ne’ebé iha.

“Antes ne’e tuir despaixu husu atu simu vasina voluntáriu, maibé ohin informa ba sira katak, tenki obrigatóriu atu simu hotu vasina ida-ne’e,” nia esklarese.

Iha fatin hanesan Diretora Jerál Prestasaun Serbisu Saúde, Odete da Silva Viegas, hateten parte Ministériu Saúde preokupa ho númeru kazu COVID-19 aumenta beibeik hosi loron ba loron, nune’e husu kontribuisaun forsa-sira atu partisipa másimu hodi simu vasina.

”Preokupasaun boot ida ba ita mak COVID-19 aumenta hosi loron ba loron. Tanba ne’e, ita-nia esforsu tomak atu hetan vasina, ne’ebé hetan rekomendasaun hosi Organizasaun Mundiál Saúde,” Odete da Silva Viegas subliña.

Nia esplika, vantajen hosi vasina ne’e maka atu kura moras ida-ne’e no tenki vasina hodi prepara isin, bainhira hasoru moras-ne’e bele iha ona sistema imunidade ne’ebé forte.

”Labele tauk ho informasaun falsa ne’ebé espalla iha média sosiál, hanoin katak ameasa boot ne’e iha ita-nia rain no ita hotu tenki kontribui hodi hamenus moras ne’e,” nia husu.

Tuir oráriu, membru Komponente Navál Hera hamutuk 498 sei simu vasina ne’e hahú ohin to’o 23 abríl tinan ne’e.

Dadus hosi Ministériu Saúde (MS) hatudu katak, to’o ohin loron, vasina ona ema 11.000-resin iha nível nasionál.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here