CAC, PDHJ ho IGE ofisiálmente husik ekipa Espesialista Anti-Korrupsaun (EAK) ba munisípiu hodi “eskolta” pagamentu subsídiu $100 ba kada uma-kain iha territóriu nasionál. Imajen/Mídia CAC

DILI, 05 agostu 2020 (TATOLI)- Ekipa Konjunta husi Komisaun Anti-Korrupsaun (CAC), Provedoria Direitu Umanu no Justisa (PDHJ), Inspetór Jerál Estadu (IGE) no Komisaun Funsaun Públika (CFP) husu ba benefisiáriu na’in-148 ne’ebé simu ona subsídiu agregadu familiár husi Governu atu devolve fila osan tanba la prienxe rekizitu tuir dekretu lei apoiu monetáriu ba agregadu familiár.

Notísia Relevante : MSSI Haruka ona Proposta Pagamentu Agregadus Familiár Hamutuk 326.739 ba MF 

Liuhusi rezultadu monitorizasaun no akompañamentu ekipa konjunta iha ámbitu ezekusaun subsídiu agregadu familiár iha territóriu nasionál deskobre katak benefisiáriu na’in-148 la prienxe rekizitu no iha obrigasaun tuir lei tenke entrega fila-fali osan ne’e ba Estadu.

Ekipa konjunta pro-ativu  akompaña no halo observasaun direita ba prosesu sira-ne’e, hahú iha loron 09 to’o loron 30 juñu 2020 ba munisípiu ualu (8) no iha Rejiaun Administrativu Espesiál Oe-Cusse Ambeno (RAEOA) husi loron 02 to’o loron 15 jullu 2020.

Liuhusi konferénsia imprensa, ohin, iha edifísiu  CAC,  Farol, Dili, Komisáriu CAC, Sergio Hornai, hateten, sira-nia parte hala’o atividade monitorizasaun ninia area kobertura sira mak hanesan, iha Munisípiu Ermera kobre suku 22, iha Manatuto kobre suku 21, Liquiça kobre suku 14, Aileu kobre suku 21, Baucau kobre suku tolu (3), Lautem kobre suku 14, Bobonaro kobre suku 20, Dili kobre suku ualu (8) no RAEOA kobre suku 18.

Totál area kobertura ne’ebé ekipa konjunta halo akompañamentu no observasaun ba pagamentu subsídiu agregadu familiár iha nivel suku, hamutuk suku 141 husi totál suku 452 iha  nivel territóriu nasionál.

“Husi servisu akompañamentu no monitorizasaun ne’e ekipa konjunta konsege trava ka impede benefisiáriu ne’ebé atu asesu ba subsídiu agregadu familiár ne’e hamutuk 1.927 no salva osan Estadu ho total estimativa $385.400.00 tanba la prienxe rekizitu tuir lei Nú. 15/2020,” informa Komisáriu Sergio Hornai, ne’ebé akompaña mós husi ierarkia PDHJ nian, IGE no mós CFP.

Ekipa konjunta mós identifika benefisiáriu sira ne’ebé la elejivel tuir lei, maibé sira konsege simu/asesu tiha ona ba subsídiu ne’e no ekipa la konsege trava hamutuk benefisiáriu na’in-148 ho total osan $29.600.00.

Ekipa konjunta deskobre mós benefisiáriu  sira ne’e nia naran dobru iha fatin ida (sentru pagamentu ida) no lista nu’udar benefisiáriu mosu entre fatin ka suku ida ho suku seluk (naran sai iha fatin rua).

Ekipa konjunta mós nota dehan  iha indísiu forte katak iha joven barak mak rejistu nu’udar benefisiáriu hodi asesu ba subsídiu agregadu familiár, maske sira la prienxe rekizitu nu’udar agregadu família ka uma-kain.

Sergio Hornai, hatutan iha mós impresaun no indísiu katak autoridade lokál no komunitária sira permite joven sira livremente rejistu nu’udar benefisiáriu tanba la iha prosesu verifikasaun ida rigorozu husi Ministériu Administrasaun Estatál (MAE) no Ministériu Solidariedade, Sosiál no Inkluzaun (MSS).

Tuir Sergio Hornai, iha autoridade lokál balun prefere atu la-foti risku hodi trava juventude sira ne’ebé insiste atu asesu apoiu agregadu familiár maske sira la prienxe rekizitu tanba erru no fallansu kona-ba dadus verifikasaun ne’ebé mai husi MAE no MSSI.

Iha dadus no prova katak benefisiáriu sira ho saláriu/rendimentu mensal superior $500,00 ba leten, maibé sira mós naran sai iha lista aprovadu hodi asesu ba fundu apoiu agregadu familiár. Nune’e mós benefisiáriu balun laiha  ka la hatudu dokumentu komprovativu tuir lei haruka, maibé autoridade lokál no komunitária sira fasilita deklarasaun atu permite benefisiáriu hirak ne’e asesu ba  apoiu agregadu familiár nian.

Tuir monitorizasaun ekipa konjunta nian ne’e mós rejista, iha suku balun hatudu indísiu ba falsifikasaun dadus agregadu familiar exesivamente atu fasilita sira-nia populasaun asesu ba agregadu familiár; porezemplu ida iha tinan 2019; dadus total uma-kain maizumenus 900- resin, maibé iha tinan 2020 númeru ne’e sa’e ba 4.000-resin

Ekipa konjunta rejista mós iha benefisiáriu balun ne’ebé naran la rejista iha sistema baze-de-dadus dezde inísiu, la iha dokumentu komprovativu, maibé autoridade lokál no komunitária sira halo kualkér maneira atu fasilita benefisiáriu hirak ne’e hodi asesu ba subsídiu ne’e.

Iha benefisiáriu sira balun nu’udar feen ho la’en, maibé sira rejista iha fatin ketak-ketak; atu asesu ba subsídiu dobru (dala rua) maske sira mantein nu’udar família ida.

“Agora sira ne’ebé ekipa konjunta deteta ne’ebé la prienxe rekizitu  apoiu monetáriu ba agregadu familiár tuir Lei Nú. 15/2020 ida konsege trava, maibé sira ne’ebé la konsege trava tanba pagamentu la’o liu tiha ita, nune’e la konsege trava, maibé ita deteta  tanba ne’e husu benefisiáriu sira-ne’e atu devolve fali osan Estadu nian tuir lei haruka,” Komisáriu CAC, Sergio Hornai hateten.

Sergio Hornai fó oportunidade ba benefisiáriu hirak ne’e atu devolve osan Estadu tuir tempu ne’ebé iha, maibé la kumpre mak CAC sei halo nia papél abreviguasaun ka investigasaun tuir prosesu ne’ebé iha.

Ekipa konjunta husu ba ministériu relevante no instituisaun tutela sira atu hola medida administrativa ba infrasaun administrativa prosesu tuir lei.

Ekipa konjunta mós haruka ona relatóriu monitorizasaun ba Governu ho Parlamentu Nasionál  hodi informa rezultadu   sira ne’ebé ekipa observadór sira hetan iha terrenu.

 Kongratula esforsu Instituisaun Estadu

Komisáriu CAC, Sergio Hornai, lori ekipa konjunta nia naran hakarak kongratula esforsu Instituisaun Estadu tomak, partikularmente, polítika VIII Governu Konstitusionál hodi responde ba propagasaun Coronavirus ka COVID-19 tanba mézmu ho limitasaun oioin, maibé Estadu Timor-Leste konsege trava transmisaun  infesaun COVID-19 husi fatin izolamentu hodi la da’et ba sosiedade. Nune’e, finalmente iha loron 15 maiu 2020, Timor-Leste ofisiálmente deklara livre husi  kazu ativu (pozitivu) ba  COVID-19, maske nasaun barak sei  kontinua enfrenta no luta hela hodi ultrapasa ameasa propagasaun peste letál ne’e.

Iha ámbitu servisu ba prevensaun COVID-19 nian, ekipa konjunta ne’ebé kompostu husi CAC, PDHJ, IGE no CFP ne’ebé ho knaar prinsipál tuir ida-idak ninia mandatu atu prevene no kombate korrupsaun, promove governasaun di’ak, proteje direitu umanu iha Timor-Leste, kombina no reúne rekursu no esforsu atu servisu hamutuk hodi halo observasaun, fiskalizasaun, no kontrola ba inisiativa no polítika pozitivu sira Estadu nian atu hatán ba pandemia ne’e.

“Esforsu hirak-ne’e atu asegura katak inisiativa no polítika di’ak hirak ne’e labele monu ba irregularidade no poténsia risku ba mal-jestaun, abuzu podér, kobransa ilegál no krime relevante sira iha domíniu korrupsaun nian durante implementasaun apoiu monetáriu ba agregadu familiar tuir lei númeru 15/2020,” Komisáriu Sergio Hornai afirma.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here