Postu UPF iha liña fronteira Eufauk, Postu Administrativu Balibo, Munisipiu Bobonaro. Imajen Tatoli/Eugénio Pereira.

DILI, 06 maiu 2021 (TATOLI)—Primeiru Ministru (PM) no Ministru Interiór (MI), Taur Matan Ruak hamutuk ho Komandante Jerál Polísia Nasionál Timor Leste (PNTL), Komisáriu Polisia, Faustino da Costa,  sei halo inaugurasaun ba postu seguransa Komandu Unidade Polísia Fronteira (UPF), iha liña fronteira Eufauk, postu administrativu Balibo, munisípiu Bobonaro, iha sesta (07/05).

“Aban Primeiru Ministru no Ministru Interiór ho Komisáriu Polísia, Faustino da Costa sei halo inaugurasaun ba postu UPF iha liña fronteira Balibo baliza ho Indonézia,” Portavós PNTL, Superintendente Xefe, Arnaldo de Araújo hateten ba jornalista Agência Tatoli iha Caicoli, kinta ne’e.

Notísia relevante:UPF detein timoroan 30 tama ilegál hosi fronteira

Maski la temi detalla kona-bá montante orsamentu no mós medida konstrusaun hosi postu foun UPF Eufauk, maibé Superintendente Xefe, Arnaldo de Araújo dehan, hahú konstrusaun iha 2020 no remata iha 2021, ne’ebé hetan apoiu fundu hosi Timor Leste Police Development Program (TLPDP).

Arnaldo de Araújo, dehan postu UPF ne’e estabelese hodi fasilita membru UPF bele hela durante asegura liña fronteira.

Tuir ajenda ne’ebé Agência Tatoli asesu hosi Gabinete Komandu PNTL, serimónia inaugurasaun sei hala’o iha tuku 9:00 otl, hosi PM Taur Matan Ruak, asiste mós hosi Vise Ministru Interiór, António Armindo.

Hafoin inauguran, Xefe Governu sei hato’o mensajen ba Komandu UPF no Komandu PNTL Bobonaro, ne’ebé responsabiliza seguransa iha Fronteira ho Atambua-Indonézia.

Ministru Interiór ho Komandante PNTL, sei hala’o mós ekontru ho Komandante UPF, Superintendente João Sancho Pires, hodi diskute kona-bá planu serbisu no dezafiu ne’ebé UPF hasoru.

Komandu UPF hala’o misaun tuir prosidimentu prátika ka funsaun espesializada no seguransa fronteira, bainhira hala’o sira-nia knaar no fó kompreensaun ida kona-bá knaar no funsaun operasionál, administrativa membru hotu-hotu iha PNTL.

Baze legál mandatu PNTL ba UPF ne’e, foti hosi IV Governu Konstitusionál hatuur iha Dekretu-Lei númeru 9/2009, loron-18 fevereiru, kona-bá lei orgánika PNTL, artigu 33 ho funsaun hala’o patrullamentu no vizilánsia iha fronteira territoriál, no iha koordenasaun no kooperasaun ho parte interesada sira, espesialmente ho F-FDTL.

Alende ne’e, kontrola movimentu ema no sasán sira iha fronteira territoriál, ho koordenasaun no kooperasaun ho Serbisu Imigrasaun no Alfándega.

UPF mós koopera ho autoridade administrativa relevante-sira seluk, tuir lezislasaun fiskál, aduaneira no sanitária, atu aplika lei-sira relasiona ho tráfiku umanu, tráfiku droga ilegál, tráfiku kilat no atividade kriminál organizadu sira-seluk.

Membru UPF ativu hamutuk na’in 363 kompostu feto na’in 16 no mane 347, hala’o sira-nia knaar fó seguransa iha Aeroportu, hodi hala’o patrullamentu hale’u pista, terminál no aeroportu ho kooperasaun ho parte interesada sira-seluk no knaar lejítimu tuir misaun.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here