Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

DILI, 25 janeiru 2021 (TATOLI)–Komandu Unidade Polísia Fronteira (UPF) detein timoroan na’in-30 ne’ebé hakat ilegál hosi fronteira  Indonézia tama mai Timor-Leste.

Ema hirak-ne’e UPF detein bainhira halo viajen la’o subar iha fatin rurál hanesan mota laran, foho lolon no ai-laran tuan sira ne’ebé halo baliza entre fronteira Timor-Leste no Indonézia.

Portavós Komandu Jerál PNTL, Superintendente Xefe, Arnaldo de Araújo informa ema sira-ne’e UPF detein durante operasaun loron haat, 21-24 janeiru 2021.

“Hafoin ita harii tiha postu iha área jalan tikus sira ne’ebé risku, hahú hosi 21-24 janeiru liuhosi operasaun, UPF kaptura timoroan hamutuk na’in-30 tama ilegál iha fronteira tolu hanesan Suai, Bobonaro no Oé-Cusse nian,” Arnaldo ba jornalista iha Kaurtél Jerál PNTL, Dili, segunda ne’e.

Abitante sira-ne’e kompostu hosi mane 17 no feto na’in-13 UPF entrega ona ba ekipa Ministériu Saúde hodi haruka hela iha fatin kuarentena ne’ebé Governu harii ona.

Enkuantu, iha semana kotuk, durante implementasaun Estadu Emerjénsia (EE) dasiak, UPF detein uluk sidadaun na’in-86 tama ilegál iha-ne’ebé maioria mesak timoroan.

Harii ekipa Tack Force

Iha fatin ketak, Ministru Defeza, Filomeno da Paixão de Jesus sei propoin ba reuniaun Konsellu Ministru harii ekipa Task Force ida kompostu liña ministeriál sira hotu envolve halo operasaun hamutuk ho Unidade Polísia Fronteira (UPF) no F-FDTL hodi halo kontrolu no operasaun hamutuk iha liña fronteira terrestre no tasi.

Ministru dehan, ekipa konjunta ne’e importante hodi halo operasaun sériu no evita ema labale deskonfia katak membru polísia mak fasilita ema seluk halo viajen ilegál iha fronteira Atambua no Timor-Leste nian.

Ministru tenik, to’o agora populasaun balun sei barani hakat tama ilegál fronteira Timor-Leste, tanba deskonfia oknum polísia balun mak fasilita.

Filomeno haktuir katak iha fulan hirak ba kotuk, grupu organizasaun arte marsiál sira halo viajen tama-sai bá sa’e sintu iha Atambua, tanba detetadu pesoál UPF mak fasilita.

“Tenke harii Task Force ho sériu, nune’e ita hotu nia servisu bele hetan rezultadu ida di’ak. Ita hotu lakohi hetan moras COVID-19 no ita lakohi oho an,” nia hateten iha Palásiu Prezidente Nicolau Lobato, Bairru Pité, ohin.

Nia informa, Governu rasik husu ona ba Komandu F-FDTL atu reforsa servisu UPF hamutuk ho Unidade Espesiál Polísia (UEP), Unidade Polísia Marítima (UPM) hodi asegura lutu seguransa fronteira Bobonaro, Covalima, Oé-Cusse no Ataúro nian.

Harii tan postu haat iha fronteira

Entretantu, Komandante Jerál Polísia Nasionál Timor-Leste (PNTL), Komisáriu Polísia, Faustino da Costa informa polísia aumenta tan postu vizilánsia haat iha liña fronteira terrestre hodi evita viajen no prevene ameasa surtu COVID-19 ne’ebé sa’e maka’as iha viziñu Atambua-Indonézia.

Postu sira ne’ebé UFP harii iha área Batugade, Balibo, Covalima no Oé-Cusse. Postu hirak-ne’e hetan seguransa hosi forsa ekipa Unidade Espesiál Polísia (UEP), UPF, Unidade Polísia Marítima no koopera ho membru F-FDTL sira.

“Postu sira ne’ebé ita aumenta ne’e identifikadu risku boot liubá ema tama-sai iha tempu kalan no loron,” nia haktuir.

Komandante ne’e rekoñese, fronteira Timor-Leste luan, tanba ne’e ekipa konjunta susar halo kontrolu kobre to’o liña fronteira terrestre hotu-hotu.

Nia tenik, ema sira ne’ebé tama ilegál, UPF kontinua kaptura aprezenta ba ekipa COVID-19 atu haruka sira hela iha kuarentena no bainhira ramata PNTL halo prosesu hasoru sira tanba kontra regra implementasaun EE dasiak.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here