Prezidente Tribunál Rekursu, Deolindo dos Santos. Imajen Tatoli /Egas Cristovão

DILI, 11 janeiru 2021 (TATOLI) – Ekipa hosi instituisaun relevante finaliza ona formuláriu ba deklarante kargu-xefia sira iha instituisaun Estadu hotu atu deklara rendimentu, bens interese tuir artigu 27 to’o artigu 58, lei númeru 7/2020 kona-ba Medida Prevensaun no Kombate Korrupsaun (MPCC, sigla portugés).

Notísia Relevante : Bainhira Lei MPCC Vigora, Xefe Departamentu To’o PR Nia Rikusoin Seidauk Bele Deklara ba Públiku

Primeiru-Ministru (PM), Taur Matan Ruak, mós halo ona despaixu ba ekipa instituisaun relevante sira atu haree hamutuk kumprimentu lei MPCC molok vigora iha loron 22 fevereiru 2021.

“Ha’u hato’o ho despaixu PM nian kona-ba ekipa ida ne’ebé atu haree hamutuk kumprimentu lei MPCC,” prezidente Tribunál Rekursu (PTR), Deolindo dos Santos, hato’o asuntu ne’e, ohin, hafoin enkontru ho Xefe Governu iha Palásiu Governu, Dili.

PTR informa, formuláriu ne’e sei disponibiliza elétrikamente iha sítiu Tribunál nian, nune’e parte interesante prienxe tuir formuláriu ne’e.

“Lei MPCC obrigatóriamente sei kesi metin funsionáriu públiku liuliu kargu xefia sira hosi nivel xefe departamentu ba to’o iha nivel diretór jerál atu deklara rikusoin,” Deolindo esplika.

Oras ne’e daudaun, Komisaun Anti-Korrupsaun (CAC) kontinua halo diseminasaun lei MPCC iha territóriu ba funsionáriu públiku hodi bele fó koñesimentu molok lei ne’e vigór.

Durante enkontru, Deolindo aprezenta mós ba Primeiru-Ministru Taur Matan Ruak, kona-ba serbisu Tribunál nian iha tinan 2020 no prioridade iha 2021 liuliu ezekusaun orsamentu ne’ebé prevee ba Tribunál Rekursu hamutuk $8,388,940, bazeia ba planu no programa ne’ebé trasa ona.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here