Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo. Imajen TATOLI/António Gonçalves.

DILI, 05 maiu 2021 (TATOLI)—Reuniaun Konsellu Ministru (KM) iha kuarta ne’e aprova ona proposta hosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Jerónimo, ba nomeasaun José António Belo nu’udar Prezidente Konsellu Administrasaun Rádiu no Televizaun Timor-Leste, Empreza Públika (RTTL, EP) ba períodu tinan haat.

“Ha’u garante Prezidente RTTL foun sei servisu ho di’ak liu no kontinua servisu ne’ebé iha ona atu mellora servisu di’ak liután,” Ministru Francisco Jerónimo, hateten ba Agência TATOLI hafoin reuniaun ezekutivu, iha Ministériu Finansa, Aitarak-laran, kuarta ne’e.

Notísia relevante: Governu nomea José António Belo lidera RTTL,E.P

Governante ne’e dehan, prezidente foun sei kontinua prioridade empreza estatál ne’e no apoia polítika Estadu iha dezenvolvimentu nasionál.

“Polítika Governu no Estadu nian mak dezenvolvimentu nasionál, ne’ebé tenke sai hanesan parte ida mós ba mídia estatál ne’e, hahú hosi infraestrutura no rekursu umanu,” nia akresenta.

Nune’e, Ministru husu ba Prezidente foun atu uza profisionalizmu hodi mellora servisu sira iha RTTL, E.P di’ak liután.

“Ha’u hakarak agardese ba Prezidente RTTL, E.P sesante, Francisco da Silva ‘Gary’ tanba durante ne’e servisu hamutuk ho ha’u, maibé ohin Konsellu Ministru deside ona atu troka. Ha’u fiar sei presiza nafatin nia (Prezidente sesante) atu servisu hamutuk ho ha’u,” nia dehan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here