Edifísiu Golgota mall. Imajen espesiál.

DILI, 27 abríl 2021 (TATOLI)—Ministériu Saúde (MS), identifika no prepara-tan fatin neen (6) atu transforma ba fatin izolamentu pasiente COVID-19, tanba oras ne’e daudaun númeru pasiente aumenta makaas.

Fatin neen ne’ebé identifikadu mak hanesan Golgota mall, edifísiu eskola Xina iha Bairru Fomoza, edifísiu STM Becora, Hotel Eternity Fatuhada, ida iha Munisípiu Manatuto no ida seluk mak Uma retiru Padre sira-nian iha Dare.

Notísia relevante:COVID-19: kazu foun 52, rekoperadu 18 no ativu 1.050

“Iha sábadu to’o domingu foin lalais ne’e, parte MS hamutuk ho Sala Situasaun Sentru Integradu Jestaun Krize tun ba terrenu hodi haree fatin-sira atu uza ba sentru izolamentu iha Dili, tanba oras ne’e númeru aumenta makaas,” Diretór Jerál Serbisu Kooperativa, MS,  Marcelo Amaral, hateten ba jornalista Agência Tatoli, tersa ne’e.

Ekipa ne’e observa uluk iha Golgota mall hanesan loja ne’ebé mak la uza, ekipa husu ba na’in atu bele konstrui didi’ak, hodi uza ba sidadaun-sira ne’ebé pozitivu.

“Agora daudaun ami negosia hela ho loja na’in, atu nune’e bele modifika fali fatin ne’e, hodi sai fatin izolamentu tanba akomoda ema to’o 150 ho presu razoável kompara ho sira ne’ebé durante ne’e ita aluga,’’ Marcelo Amaral esplika.

Ekipa mós halo observasaun daruak iha edifísiu eskola Xina ne’ebé lokaliza iha Bairru Formoza, maibé tenki halo reabilitasaun.

Kona-bá ida ne’e, enjeñeiru no Ajénsia Dezenvolvimentu Nasionál (ADN) halo hela levantamentu tékniku, atu haree parte ne’ebé mak bele hadi’a, nune’e  bele prepara ba fatin izolamentu.

Kona-bá edifísiu SMT Becora, ekipa haree katak, presiza halo reabilita ba haris fatin, instala bee moos, nune’e kria kondisaun  diak ba maluk-sira ne’ebé pozitivu no bainhira COVID-19 hotu bele utiliza hikas edifísiu eskola ne’e.

Hotel Eternity iha Fatuhada, ekipa observa katak, fatin ne’e iha andar lima no deside atu utiliza andar haat sai izolamentu, nune’e ekipa tau ona kama toba nian iha andar haat ne’e, bainhira  prontu ona bele utiliza.

Iha mós fatin ida iha Munisípiu Manatuto ne’ebé ekipa hakarak utiliza hanesan sala izolamentu, ne’ebé tau ona kama 60 no pasiente balun transfere ona iha domingu ne’e.

Alende ne’e, sei utiliza mós uma retiru Padre-sira nian iha Dare, no ekipa aprovizionamentu lojístika halo hela negosiasaun, bainhira presu razoável bele utiliza.

Parte Ministériu Saúde mós haree hela posibilidade, bainhira númeru aumenta makaas mak fatin sira ne’e okupadu hotu, entaun sei haree tan fatin públiku-sira bele esplora liu-tan, liuliu eskola-sira ne’ebé bele akomoda ema barak.

Oras ne’e daudaun, Timor-Leste (TL) iha sentru izolamentu ativu hamutuk lima mak hanesan izolamentu antiga Ospitál Lahane, sentru izolamentu Tasitolu, SK Hotel Metiaut, Hotel Novo Horizonte no Vera Cruz.

To’o horisehik, Sala Situasaun Sentru Integradu Jestaun Krize (SIJK) rejista kazu pozitivu COVID-19 hamutuk 52, rekoperadu 18, kazu ativu 1.050.

Jornalista: Felicidade Ximenes

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here