Ministru Reforma Lejizlativa no Asuntu Parlamentár, Fidelis Leite Magalhães, kaer liman ho Prezidente Konsellu Administrasaun RTTL,ep, Francisco da Silva Gary hafoin nia hetan pose iha Palásiu governu

DILI (TATOLI) – Hafoin hetan nomeasaun husi oitavu Governu liuhosi reuniaun Konsellu Ministru iha loron 9 Janeiru 2019, Francisco da Silva Gary, ohin simu posse nu’udar Prezidente Konsellu Administrasaun Rádiu Televizasaun Timor-Leste (RTTL, ep).

Prezidente Konsellu Administrasaun RTTL,ep, Francisco da Silva Gary hatoo diskursu

Iha ninia diskursu, Francisco da Silva Gary fó apresiasaun profundu ba Governu ne’ebé depozita ona konfiansa ba nia hodi sai Prezidente ba Konsellu Administrasaun RTTL, ep.

“Ha’u sei serbisu maka’as atu halo instituisaun  ne’e sai forte, kredivel no efikás. Ha’u mós hato’o apresiasaun ba ema sira ne’ebé to’o ohin-loron serbisu maka’as hodi dezenvolve RTTL,ep, inklui ha’u-nia predesesór sira”, Gary haktuir.

Nia konvida jornalista, funsionáriu dirijente, no parte sira interesada, atu fó laran ba malu hodi serbisu hamutuk, sai dixiplinadu, dedikadu no profisionál hodi konkretiza mehi sai roman ba nasaun, ne’ebé hare kultura timoroan nu’udar baze ba dezenvolvimentu.

Sekretáriu Estadu Komunikasaun Sosiál (SEKOMS), Governu iha kompromisu boot hodi investe iha instituisaun estadu ne’e, hodi halo sai instituisaun ida modernu.

Signifika halo modernizasaun ba ekipamentu RTTL, ep nian hosi análogu ba dijitál, no ita sei hahú misaun boot ne’e iha tinan ne’e 2019.

Nune’e mós nia fó apresiasaun profundu ba serbisu oioin ne’ebé parte hotu-hotu halo ona atu empreza públiku ne’e kumpre ninian misaun hodi sai roman ba nasaun.

Aproveita biban, Gary konvida dirijente no funsionáriu sira, espesiálmente jornalista sira, atu kaer-metin dixiplina, dedikasaun no profisionalizmu hodi fornese informasaun ne’ebé di’ak-liu ba povu doben Timor-Leste no mundu.

Tuir nia, ezisténsia instituisaun estadu ne’e to’o ohin loron, hatudu dedikasaun, dixiplina no profisionál, maski nune’e, nia rekoñese presiza nafatin atu serbisu hamutuk nu’udar ekipa hodi hala’o misaun.

“Serbisu hamutuk bele mosu bainhira ita fó-laran ba malu hodi defende kór ka ‘Bandeira’ maibé kór no bandeira Timor-Leste nian de’it. Ho nune’e mak ita bele halo RTTL,ep sai fonte informasaun ne’ebé kredivel, ne’ebé iha laran ninian funsionáriu sira tane aas profisionalizmu no independénsia editorial.”

“Hamutuk ita sei halo ita-nia programa no planu atividade oioin atu ema Timor-Leste hadomi liután RTTL,ep”.

Ministru Reforma Lejizlativa no Asuntu Parlamentár, Fidelis Leite Magalhães

Biban hanesan, Ministru Reforma Lejizlativa no Asuntu Parlamentár, Fidelis Leite Magalhães hateten, agora momentu oportunu atu hare fila fali lala’ok husi kotuk to’o agora, hodi oinsá bele hakat hodi ba oin bele hadi’a di’ak liután kualidade servisu RTTL nian.

“Konsellu Ministru hili prezidente foun, hanesan esforsu integradu atu hadi’a servisu instituisaun ne’e nian, nune’e hanesan faze iniísiu husi konfiansa ne’ebé mak prezidente foun tenke hasoru. Ohin hanesan eventu importante atu fó knar no espressa konfiansa ba dezafiu lideransa foun atu bele hasoru laloran boot iha ninia knar”, Ministru ne’e dezafia.

Governante hatutan, Governu nia esperansa mak atu husi lideransa foun ne’e atu kumpre duni termu juramentu ne’ebé halo ona.

“Husi parte Governu nian, ami sei respeita ita boot nia independénsia editorial, ami iha ne’e atu apoiu hodi professionaliza ita boot nia servisu para bele konkretiza objetivu ne’ebé mak iha”, nia promete.

Entretantu, Francisco da Silva “Gary” hetan nomeasaun hodi troka Prezidente Konsellu Administrasaun Rádiu Televizasaun Timor-Leste (RTTL),ep sesante, Gil da Costa, ne’ebé konsege kumpre mandatu tinan ida hafoin hetan ezonerasaun liuhosi desizaun ezekutivu.

Gil da Costa, hetan nomeasaun husi VII Governu liuhosi reuniaun Konsellu Ministru iha loron 25 Janeiru 2018 no hetan tomada posse iha loron 1 Fevereiru 2018.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here