Médiku-sira hala’o teste swab masal ba komunidade iha Sentru Formasaun Polísia (CFP) Comoro, tersa (04/05/21). Imajen Tatoli/António Gonçalves.

DILI, 04 maiu 2021 (TATOLI)—Sala Situasaun Sentru Integradu Jestaun Krize (SIJK), rejista kazu pozitivu COVID-19 hamutuk 129, rekoperadu 69 no  ativu 1.315.

“Totál kazu konfirmadu kumulativu sura hosi 21 marsu 2020, hamutuk 2.653. Ohin deteta kazu 129   iha Dili 102 no Munisípiu seluk 27. Totál kazu ativu 1.315 no kazu rekoperadu 69,’’ Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, hateten liu hosi komunikadu, tersa ne’e.

Notísia relevante:COVID-19: pozitivu 80, rekoperadu 82 no ativu 1.255

Hosi totál kazu detetadu ohin, mane 89  no feto 40. Idade 12 na’in-rua. Entre tinan 12-59 na’in 124 ka 69,1%, ho idade 60 na’in-tolu no asintomátiku 76,7%.

Kazu pozitivu129, iha na’in 56 (43,3%) mak detetadu tanba halo teste ho razaun atu halo viajen ka halo ona viajen ba Munisípiu ka estranjeiru.

Hosi horisehik mai ohin, hamutuk hotu Laboratóriu Nasionál Saúde halo  testes PCR 1.005, ho detalla hanesan tuir-mai, Vijilánsia sentinela 62, Rastreiu ba kontaktu ka Contact tracing 104, Rastreiu Aleatóriu ka Random Screening 348, Viajen sai-hosi serka sanitária Munisipiu Dili 422, Viajen internasionál 39, Follow up iha kuarentena 30.

Totál testes PCR ne’ebé halo horisehik  iha Munisípiu sira seluk hamutuk 256, ho detalla hanesan tuir-mai, Baucau 136, Maliana laiha, Maubisse 133,  Suai 62,  Viqueque 42, Ermera 53, Maubessi 99 no RAEOA 11. Teste  follow-up  ba sira iha fatin  izolamentu  94 (70 negativu ona 24 sei nafatin pozitivu).

Tabela evolusaun surtu COVID-19 iha Timor Leste (TL) hahú 22 fevereiru 2021, tuir klasifikasaun transmisaun OMS nian, Aileu ualu totál kazu iha oras 24 na’in-ida, totál kumulativu  kazu rekoperadu ida,  totál kazu ativu ohin hitu, kazu esporádiku.

Ainaro 19, kazu rekoperadu ida,  kazu ativu ohin 18 kazu esporádiku. Baucau 112, totál kazu iha oras 24  hamutuk 13, kazu rekoperadu 17  no total kazu ativu ohin 95 kazu  iha cluster. Bobonaro 17, totál kazu iha oras 24 hamutuk rua, kazu rekuperadu  neen, ativu ohin 11 kazu esporádiku. 

Covalima 53, kazu iha oras 24 na’in-ida rekoperadu 18, kazu ativu ohin 35 kazu iha cluster. Dili 2.277, totál kazu oras 24 iha 102, kazu rekoperadu 1.253 no kazu ohin 1.020, totál kumulativu  óbitu haat, Kazu iha transmisaun komunitária.

Ermera 49, kazu rekoperadu 12, ativu ohin 37 kazu iha cluster. Lautem 20, kazu iha oras 24  neen, rekoperadu tolu, no ativu 17 kazu esporádiku. Liquiça 15, rekoperadu sia, ativu neen  kazu esporádiku.

Manatuto lima, rekoperadu  ida, ativu haat  kazu esporádiku,  Manufahi 52 kazu iha cluster, RAEOA hitu, rekoperadu tolu, ativu  tolu kazu esporádiku.  Viqueque 19, kazu iha oras 24 haat rekoperadu sia, ativu ohin 10 kazu iha cluster.

Evolusaun surtu COVID-19 iha Munisípiu Dili no Munisípiu sira-seluk no mós RAEOA atu bele hatene surtu ida ninia evolusaun, no mós surtu ne’e aumenta ka diminui, indikadór ida ne’ebé matenek-na’in epidemiolojia uza, maka insidénsia.

Konvensionalmente insidénsia sukat totál kazu foun, kada loron, pur abitante rihun 100, no hatudu risku ne’ebé populasaun iha atu hetan da’et moras ida. Hatudu kazu detetadu foun kada loron iha Timor-Leste tomak.

Ba ohin loron, hosi insidénsia COVID-19 iha TL durante loron hitu ikus mak 6,6/abitante rihun 100, enkuantu ba de’it Munisípiu Dili ohin loron 22,5/abitante rihun 100.  Insidénsia iha leten sei nafatin hatudu katak, Munisípiu Dili mak fatin ho risku bo’ot liu atu populasaun hetan da’et no hada’et tutuan virus SARS-CoV-2.

Iha 04 maiu 2021, izolamentu Vera Cruz halo tratamentu ba kazu detetadu na’in 21. Iha área obstetrisia na’in-lima, medisina interna na’in 11, pediatria na’in-lima.  Sira na’in-lima iha obstetrisia, kategoria moderadu hotu, sira-nia kondisaun estável.

Sira na’in 11 iha medisina interna, haat  grave uza hotu oksijéniu, na’in-hitu  moderadu.  Hosi kazu lima pediatria, haat moderadu, ida grave. Na’in-ida grave uza CPAP, no haat moderadu la uza ona oxijéniu.

Apela ba populasaun iha Timor-Leste laran tomak atu tu’ur hakmatek, kumpri ho rigór regra serka sanitária no konfinamentu domisiliáriu ne’ebé, Konsellu Ministru deside ona implementa hahú 30 abríl.

Husu atu hotu-hotu kolabora ho autoridade saúde hodi bele buka-tuir ema hotu ne’ebé hetan da’et ona virus ne’e, no izola hosi ema ne’ebé seidauk hetan da’et-tutan.

Apela ba populasaun iha Dili laran no mós iha Munisipiu sira seluk, atu aprezenta-an iha fasilidade saúde públiku  ne’ebé besik, bainhira sente isin-manas, ka kakorok moras, ka inus-been, ka mear, hodi bele hetan atendimentu hosi profisionál saúde-sira.

Ba populasaun iha Timor-Leste tomak, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira ne’e, mak hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur malu barak, hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here