Komunidade suku Manleuana, postu adminisrativu Dom Aleixo, troka voucher ho produtu Cesta Bázika iha supermerkadu Leader, tersa (09/02). Imajen Tatoli/António Gonçalves.

DILI, 05 maiu 2021 (TATOLI)—Komisaun Anti Korrupsaun (CAC sígla portugés), deskobre irregularidade balun hosi kompañia distribuidór balun, durante distribuisaun Cesta Bázika iha munisípiu Dili.

Komunikadu ne’ebé Agência Tatoli asesu kuarta ne’e, hateten, iha 04 maiu, ekipa Diresaun Prevensaun CAC, kontinua halo inspesaun no monitorizasaun ba distribuisaun Cesta Bázika iha Dili.

Notísia relevante:CAC kontinua analiza informasaun Cesta Bázika “fuhuk”

Iha inspesaun ne’e, ekipa rekolla uluk lista protudu hosi kompañia no verifika sasan-sira kada item, hafoin verifika, ekipa tetu sasan-sira atu konfirma produtu hirak-ne’e ninia kilograma tuir tabela ne’ebé estabelese entre kompañia ho ministériu tutela.

Durante prosesu, ekipa deskobre infrasaun balun liuliu iha item ‘naan karau’ ne’ebé distribui ba benefisiáriu-sira la to’o kilograma ida.

Tuir kontratu no tabela ne’ebé estabelesidu, kada ema sei simu na’an kilograma ida, maibé kompañia fornese de’it grama 800 (0.8kg), signifika benefisiáriu-sira lakon sira-nia direitu grama 200 ka (0,2kg).

Situasaun ne’e implika prejuizu ba Estadu no benefisiáriu-sira bazeia ba análiza estimativa simples tuirmai-ne’e, totál benefisiáriu 6.662, benefisiáriu ne’ebé simu ona 3.265, presu naan karau 1kg $11.50. Nune’e, 0,2kg x $11.50=$2.30, totál benefisiáriu ne’ebé simu ona (3265x $2,30=$7,509.50).

“Ne’e signifika, kompañía iha obrigasaun atu kompleta fali $2.30 ba kada benefisiáriu ne’ebé nia totál komulativu ba benefisiáriu 3.265 hamutuk $7,509.50,’’ komunikadu ne’e haktuir.

Kazu ne’e hatudu katak, bainhira CAC la halo intervensaun, provavelmente Estadu bele hetan prezuiju hamutuk $15.322.60, hosi totál benefisiáriu 6.662, ne’ebé hatudu iha leten.

Hafoin hetan tiha infrasaun ne’e, CAC notifika kedan responsável Kompañia hodi buka solusaun.

Tanba atuasaun no intervensan ne’e sei iha ámbitu serbisu prevensaun-nian, nune’e, CAC diskute opsaun ka alternativa rua ho Kompañia.

“Ida  ne’e kompleta fali valór folin ne’ebé menus ka Komisaun rekomenda ba ministériu tutela atu bainhira halo pagamentu, redús ka halo redusaun ba valór ne’ebé kompañia falla atu kumpri no osan fila ba kofre Estadu hanesan baibain,’’ CAC subliña iha komunikadu ne’e.

Bazeia ba prosesu ne’e, Kompañia deklara katak, prontu atu kompleta fali $2.30 ba kada benefisiáriu ne’ebé simu tiha ona ho ninia presu estimativa hamutuk $7.509.50.

Iha loron  25 marsu 2021, CAC liu hosi serbisu prevensaun, konsege trava osan ho valór $56.587.50, no haruka ba kofre Estadu. Valór ida-ne’e mai hosi rezultadu inspesaun iha terrenu ba kompañia rua ne’ebé distribui Cesta Bázika iha Munisípiu balun, maibé la kumpri rekízitu-sira ne’ebé estabelese iha akordu.

Prejuizu Estadu ne’ebé Komisaun rekupera ne’e, parese nia valór la’ós  signifikativu, maibé ida-ne’e ilustra hela faktu balun iha irregularidade lubuk ida-ne’ebé akontese durante implementasaun.

CAC fiar katak, infrasaun ka irregularidade sira hanesan ne’e, potensialmente akontese iha fatin barak, infelizmente, Komisaun labele halo intervensaun regulár ba munisípiu-sira tanba rekursu ne’ebé limitadu no mós COVID-19 ne’ebé rezulta atividade barak paralizadu, hodi ajusta no kumprimenta ba protokulu prevesaun COVID-19.

CAC hakarak apela ba kompañia no responsável ministériu tutela hodi hala’o knaar ho integridade no responsável.

Tanba, prosesu-sira ne’e konklui,  CAC sei avalia dadus no keixa-sira ne’ebé tama no sei iha indísiu kriminál-ruma sei prosesa tuir lei ne’ebé vigora.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here