DILI, 03 maiu 2021 (TATOLI)—Komandu Polísia Nasionál Timor Leste (PNTL) orienta ona membru-sira, ne’ebé sei hala’o patrullamentu tama-sai bairru iha Dili, hodi halo kontrolu másimu ba sidadaun-sira, nune’e hela hakmatek iha uma, atu evita transmisaun COVID-19, ne’ebé númeru aumenta hosi loron ba loron.
Bainhira iha patrullamentu ne’e mak membru-sira deteta sidadaun ne’ebé la obedese ba regra serka sanitária, Komandu sei prosesa hodi kriminaliza bazeia ba lei.
Notísia relevante:PNTL hahú operasaun rigorozu iha Dili
“Kualkér sidadaun ne’ebé kontra lei, PNTL sei atua hodi kriminaliza no aprezenta imediatu ba Ministériu Públiku (MP), tanba konsidera la obedese ba órden autoridade,” Komandante Jerál PNTL, Komisáriu Faustino da Costa, hateten ba jornalista-sira, liu hosi konferénsia imprensa iha Kuartél Jerál Caicoli, segunda ne’e.
Komisáriu Faustino da Costa alerta katak, objetivu hosi patrullamentu ne’e tanba PNTL hakarak kontrola populasaun, tenke izola an iha uma no labele sai bainhira la’ós nesesidade urjente.
“Populasaun presiza hatene katak, konfinamentu domisiliáriu ne’e dehan, ema hotu-hotu tenke hela iha uma de’it,” nia subliña.
Nia dehan, konfinamentu domisiliáriu jerál iha kapitál Dili, tanba hakarak salva ema hotu, nune’e labele afetadu ba moras ne’e.
PNTL mós fó limitasaun ba abitante-sira atu bele sai ba klínika ka ospitál, hodi konsulta no fó asisténsia ba família ne’ebé moras ka presiza tratamentu médiku, hola sasán nesidade bázika no halo serbisu profisionál tuir rezolusaun Goveru.
Alende ne’e, PNTL mós sei halo kontrolu ba loja, supermerkadu, ne’ebé kontinua loke no fa’an sasán esensiál-sira, inklui banku ho sentru abastesimentu konvustível.
PNTL sei la fó autorizasaun atu kualkér negosiante ambulante halo atividade iha dalan-ibun no trotoar leten, eseptu merkadu Manleuana no Merkadu Taibesi mak bele loke iha dadeer tuku 6:00 to’o 16:00, tuir desizaun Governu.
Jornalista: Eugénio Pereira
Editór: Cipriano Colo
