DILI, 03 maiu 2021 (TATOLI)—Iha segunda madrugada ne’e, akontese erupsaun vulkániku iha área Raitahu, suku Uma wain kraik, postu administrativu Viqueque villa, munisípiu Viqueque, maibé la afeta ba komunidade.
Tuir Administradór munísipiu Viqueque, Januário Soares ‘Boli’, akontesimentu ne’e maizumenus tuku 02:00 madrugada ne’e, maski la iha vítima maibé konsege halo hakfodak komunidade.
“Laiha vítima tanba distánsia entre lokál akontesimentu ne’ebé hanesan foho kiik ida iha área Raitahu no komunidade sira-nia hela fatin dook malu ho distánsia kilómetru 30, tanba ne’e laiha problema,” Administradór munisipál ne’e hateten ba Agência TATOLI, via telefónika, segunda ne’e.
Autoridade munsipál ne’e haktuir, erupasaun vulkániku ne’e antes akontese ona maibé iha tinan hirak liubá.
“Ha’u uluk akompaña iha tinan 1986, akontese erupasaun vulkániku iha área Raitahu ne’ebé ahi sa’e maka’as to’o rezulta estasaun kombustível ida ahi konsege han hotu,” nia haktuir.
Nia dehan, maski foho oan ne’e sempre mosu erupasaun vulkániku, maibé to’o agora parte kompetente hanesan Institutu Petróleu no Jeolojia (IPG, sigla portugés) seidauk halo peskiza no estudu ruma hodi hatene kauza hosi akontesimentu ne’e.
Jornalista: Natalino Costa
Editora: Julia Chatarina
