Hospitál Nasionál Guido Valadares (HNGV). Imajen Tatoli/Egas Cristóvão.

DILI, 04 maiu 2021 (TATOLI)—Diretór Klíniku, Ospitál Nasionál Guido Valadares (HNGV sigla portugés), Flávio Brandão, hateten oras ne’e daudaun, HNGV halo atendimentu ba de’it pasiente ne’ebé livre hosi COVID-19.

Tanba ne’e, bainhira iha pasiente-ruma ne’ebé tama iha HNGV, médiku-sira sei halo teste PCR. Bainhira rezultadu teste pozitivu COVID-19, HNGV sei refere hodi hala’o tratamentu iha sala izolamentu, nune’e evita transmisaun ba pasiente-sira ne’ebé hala’o tratamentu iha ospitál ho kazu moras seluk.

Notísia relevante:COVID-19: pozitivu 129, rekoperadu 69 no ativu 1.315

“Iha domingu 02 maiu, iha transferénsia ba pasiente ida hosi izolamentu Vera Cruz ba HNGV atu kontinua hala’o tartamentu ba moras seluk, ne’ebé nia sofre hanesan iis boot. Sidadaun ne’e, baixa loron 13 iha Vera Cruz tanba sofre mós COVID-19. Ninia rezultadu teste ikusliu negativu ona, katak, nia livre hosi COVID-19, maibé nia presija nafatin ventiladór, tanba nia sei sofre iis boot kauza hosi fuma, entaun ita muda fali ba HNGV,” Flávio Brandão, hateten ba jornalista iha HNGV, tersa ne’e.

Diretór Klíniku ne’e esplika, nornalmente papél HNGV sei koko nafatin atu asegura fatin sira hanesan fase ran-nian, sala atendimantu ba pasiente ho moras kurasaun, sala operasaun, fatin ba inan isin-rua, nune’e labele hada’et COVID-19.

Tanba ne’e maka, kualkér pasiente ne’ebé tama HNGV, sempre halo teste PCR atu bele hatene katak, pasiente ne’e infetadu COVID-19 ka la’e.

Nune’e mós, ohin, Koordenadór Forsa Tarefa Prevensaunno Mitigasaun, Rui Maria de Araújo, hateten   ema hotu ne’ebé tama iha HNGV, obrigatóriu tenke teste swab.

“Objetivu hosi teste ne’e atu hatene katak, ema ne’e infetadu COVID-19 ka la’e, nune’e evita labele iha transmisaun ba pasiente-sira iha HNGV,” nia esplika.

Antes ne’e, médiku Timoroan-sira ne’ebé hala’o serbisu iha HNGV, sente preokupadu oitoan ho desizaun Governu liu hosi Ministériu Saúde, ne’ebé deside atu muda pasiente COVID-19 ne’ebé moras no hala’o hela tratamentu saúde iha Sentru Izolamentu Vera Cruz Dili, ba fatin sirurjia maskulinu HNGV.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here