Reitor UNTL,Franscisco Miguel Martins tula hela beo ba estudante enfermajen UNTL. Imajen/Espesial.

DILI, 04 maiu 2021 (TATOLI) – Universidade Nasionál Timor-Lorosa’e (UNTL) deside ona fulan maiu sei realiza graduasaun virtuál ba estudante finalista hosi Fakuldade Medisina no Fakuldade Edukasaun Arte Umaniora hamutuk 100-resin.

Notísia Relevante : UNTL submete ona proposta graduasaun virtuál ba MESSK

Vise-reitór UNTL asuntu estudantíl no garantia kualidade, Samuel Venâncio de Sousa Freitas, informa desizaun universidade nian maka deside ona  iha maiu nia rohan ne’e atu realiza graduasaun virtuál (online) ba estudante hosi fakuldade rua ne’ebé preparadu ona.

“Ami deside fulan maiu ne’e hodi prepara hela alternativu ruma hodi hein desizaun Governu nian. Karik loron 13 ba leten maka Governu deside kontinua medida konfinamentu obrigatóriu iha Dili entaun graduasaun virtuál ne’e ita sei realiza iha maiu nia rohan. Maibé, Governu deside hapara konfinamentu obrigatóriu entaun programa graduasaun virtuál ne’e mós ita sei kansela,” Samuel Venâncio de Sousa Freitas hateten ba jornalista iha kampus UNTL, Dili, tersa ne’e.

Nia afirma katak maske estudante finalista 100-resin de’it mak hato’o ona proposta atu hetan graduasaun online, maibé obrigasaun Universidade nian sei aprezenta mós lista estudante hamutuk 633 ba Ministériu Ensinu Superior Siénsia no Kultura (MESSK) hodi bele hetan omóloga tanba lista ne’e pakote ida hosi estudante finalista ne’ebé prepara hela atu hakat ba graduasaun.

Tuir nia katak bainhira lista estudante-633 públika ona iha Jornál da Repúblika, Universidade sei haketak tiha estudante finalista ne’ebé atu tuir graduasaun virtuál ho sira ne’ebé mak hein graduasaun prezensiál.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here