Reitór UNTL, João Soares Martins. Imajen Tatoli/Egas Cristóvão.

DILI, 28 abríl 2021 (TATOLI) – Universidade Nasionál Timor Lorosa’e (UNTL) submete ona proposta hosi estudante finalista na’in-94 hosi Fakuldade Medisina Siénsia Saúde ba Ministériu Ensinu Superior Siénsia no Kultura (MESSK) atu bele realiza graduasaun virtuál.

Notísia Relevante : MESSK seidauk simu pedidu UNTL atu realiza graduasaun virtuál

Magnífiku Reitór UNTL, João Soares Martins, hateten semana kotuk sira haruka ona lista estudante 94 nian ba MESSK atu hetan desizaun ruma kona-ba pedidu estudante-sira nian atu hetan graduasaun virtuál.

“Ita hatene estudante finalista 94 ne’e mesak fakuldade medisina siénsia saúde kompostu hosi kursu medisina jerál, enfermajen no parteira. Sira mak husu hakarak atu realiza graduasaun virtuál. Tan ne’e, ami apoia no haruka lista sira ne’e ba ona MESSK. Ita hein de’it bainhira Ministru hakarak konvoka fali diskusaun ruma, ami sei marka prezensa hodi halo esplikasaun verbal,” Reitór João Martins informa ba Agência Tatoli iha ninia servisu fatin kampus UNTL, kuarta ne’e.

Magnífiku Reitór ne’e afirma katak desizaun estudante finalista na’in 94 ne’e ezije ba universidade hakarak hetan graduasaun lalais atu bele servisu. Tanba Ministériu Saúde ninia rekizitu profisionál saúde ne’ebé servisu hodi tulun pasiente sira tenke iha diploma akadémiku.

Ministru Ensinu Superiór, Siénsia no Kultura, Longuinhos dos Santos. Imajen Tatoli/Egas Cristovão

Iha sorin seluk Ministru Ensinu Superior Siénsia no Kultura (MESSK), Longuinhos dos Santos konsidera katak nia simu ona karta estudante sira liuhosi Universidade. Karta ne’e husu atu fó apresiasaun ba implementasaun graduasaun virtuál iha UNTL.

“Ha’u simu ona karta hosi Reitór UNTL kona-ba pedidu estudante finalista 94 iha fakuldade medisina siénsia saúde ne’ebé hakarak atu hetan graduasaun virtuál. Iha tempu badak ha’u sei konvoka enkontru ida ho reitór para atu haree hamutuk media ruma,” Ministru Longuinhos dos Santos hateten.

Ministru Longuinhos akresenta katak maske nia simu ona pedidu hosi estudante 94 nian, maibé nia sei hetan tan dadus seluk tama tan mak foin halo verifikasaun dala ida. Maibé governante ne’e konfesa katak graduasaun virtuál ne’e mós sei presiza prezensa estudante sira nian, MESSK lakohi atu kontra fali regra.

Jornalista       : Tomé Amado

Editór             : Francisco Simões

 

HAKEREK NO HATÁN

Please enter your comment!
Please enter your name here