Pesoál saúde hala’o rejistu ba komunidade ne’ebé atu halo teste swab iha Sentru Saude-sira iha Dili. Imajen Tatoli/António Gonçalves.

DILI, 03 maiu 2021 (TATOLI)—Sala Situasaun Sentru Integradu Jestaun Krize (SIJK), rejista kazu pozitivu COVID-19 hamutuk 80, kazu rekoperadu 82 no totál ativu 1.255.

“Totál kazu konfirmadu kumulativu sura hosi 21 marsu 2020, hamutuk 2.524. Ohin kazu foun 80, detetadu iha Dili 75 no munisípiu seluk lima. Iha mós kazu rekoperadu 82 no totál kazu ativu 1.255,’’ Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, hateten liu hosi komunikadu, segunda ne’e.

Notísia relevante:COVID-19: kazu foun 48, rekuperadu 26 no ativu 1.260

Hosi totál kazu detetadu ohin, mane 40 no feto 40. Pasiente ho idade 12 na’in-ida, idade entre 12-59 na’in 78( 97,5%), idade 60 na’in-ida ho asintomátiku 98,7%.

Hosi na’in 80 ne’e, iha na’in 38 (47,5%) mak detetadu pozitivu tanba halo teste ho razaun atu halo viajen ka halo ona viajen ba munisípiu ka ba estranjeiru.

Horisehik mai ohin, hamutuk hotu Laboratóriu Nasionál Saúde halo teste PCR 468, ho detalla hanesan tuir-mai, Vijilánsia sentinela hitu, Rastreiu ba kontaktu ka Contact tracing 142, Rastreiu Aleatóriu ka Random Screening 109, viajen sai hosi serka sanitária munisípiu Dili 191, viajen internasionál hitu, Follow up iha kuarentena 12.

Totál teste PCR ne’ebé halo horisehik iha munisípiu-sira seluk hamutuk 256, ho detalla hanesan tuir-mai, Baucau 136, Maliana laiha, Maubisse 106,  Covalima 13,  Viqueque ualu, Ermera laiha, Maubessi 99 no RAEOA laiha.

Tabela evolusaun surtu COVID-19 iha Timor Leste hahú loron 22 fevereiru 2021, tuir klasifikasaun transmisaun OMS,  Aileu hitu, totál kumulativu  kazu rekoperadu ida,  totál kazu ativu ohin  neen, kazu esporádik.

Hosi munisípiu Ainaro 19,  kazu rekoperadu ida,  kazu ativu ohin 18  kazu esporádiku. Baucau 99, kazu rekoperadu 17, totál kazu ativu ohin 82,  kazu  iha cluster.  Bobonaro 15, kazu rekoperadu  neen, ativu ohin sia, kazu esporádiku.

Munisípiu  Covalima 52, rekoperadu 18, kazu ativu ohin 34 kazu iha cluster, Dili 2.175, totál kazu 24 oras  iha 75, kazu rekoperadu 1.184, kazu ohin 987, totál kumulativu  óbitu haat, kazu iha transmisaun komunitária.

Munisípiu Ermera 50, totál kazu iha oras 24 hamutuk lima, kazu rekoperadu 12, ativu ohin 37, kazu iha cluster. Lautém 14, rekoperadu tolu, ativu 11, kazu esporádiku. Liquiça 15,  rekoperadu sia, ativu neen kazu esporádiku. Manatuto lima, rekoperadu ida, ativu haat kazu esporádiku.

Munisípiu Manufahi 52, kazu iha cluster, RAEOA hitu, rekoperadu haat, ativu tolu, kazu esporádiku. Viqueque 15, rekoperadu sia, ativu ohin neen kazu iha cluster.

Iha  3  maiu  2021, izolamentu Vera Cruz halo tratamentu ba kazu detetadu na’in 23. Iha área obstetrisia na’in-lima, sirurjia ida, medisina interna na’in 13, pediatria na’in-lima.  Sira na’in-lima iha obstetrisia, kategoria moderadu hotu, sira-nia kondisaun estável.

Sira na’in 13 iha medisina interna, haat  grave (uza hotu oksijéniu), na’in-sia  moderadu.  Hosi kazu lima pediatria, haat moderadu, ida  grave. Na’in-ida  grave uza CPAP, no haat  moderadu la uza ona oxijéniu. Númeru kazu moderadu no grave ne’ebé baixa iha Vera Cruz, no hatudu katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Informa ba públiku katak, ema moras ne’ebé ba konsulta ka baixa iha HNGV, tenki halo teste PCR atu bele determina se nia infetadu ka la’e, hodi nune’e bele prevene hada’et tutan virus corona ba ema seluk iha ospitál laran.

Bainhira pozitivu, tratamentu ba ninia moras sei hala’o iha fatin izolamentu iha Vera Cruz, hosi médiku-sira no tuir protokolu tratamentu ba ninia moras, ne’ebé uza iha HNGV.

Aproveita informa mós ba públiku katak, fatin atu halo teste PCR mak hanesan tuir-mai, bainhira sente moras isin-manas, mear, kakorok moras ka sintoma seluk tan, bele ba konsulta iha Sentru Saúde ne’ebé besik, atu bele halo swab. Bainhira atu husu autorizasaun esepsionál sai hosi serka sanitária iha Dili, bele ba halo swab iha Centro Convenções Dili (CCD).

Bainhira sente katak sai kontaktu-besik ba ema ruma ne’ebé detetau pozitivu ona, no seidauk hetan kontaktu hosi ekipa konjunta saúde, bele liga ba númeru 119 atu organiza oinsá foti swab.

Ekipa Saúde na Familia (SnF) iha Sentru Saúde sira iha Dili, halo mós vizita ba bairru ho aldeia-sira ne’ebé detetadu kazu barak ona. Sira ne’ebé iha síntomas, ka sente kontaktu besik ho kazu pozitivu ruma, bele hakbesik ba sira hodi halo swab.

SIJK apela ba populasaun iha Timor-Leste, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here