IGE-empreza nasionál normaliza estrada iha área Bebonuk ne’ebé hetan estagu tanba dezastre naturál iha domingu (04/04). Imajen TATOLI/António Gonçalves

DILI, 03 maiu 2021 (TATOLI)-Primeiru-Ministru, Taur Matan Ruak, fó ona orientasaun ba ekipa liña ministeriál hosi Ministériu Obra Públika (MOP) no Ministériu Planu no Ordenamentu, hodi halo estudu kle’an ba estragu infraestrutura komplexa hafoin rekonstrusaun.

“Primeiru-Ministru no Vise Primeiru-Ministru fó ona orientasaun atu envolve konsultór sira hodi halo estudu ba infraestrutura komplexu sira ne’ebé hetan estragu kauza dezastre naturál atubele halo rekonstrusaun ho kualidade di’ak,” Diretór Jerál Obra públika no Koodenadór grupu tékniku, Rui Hernani, hateten ba Agência TATOLI, hafoin ramata reuniaun Konsellu Administrasaun Fundu Infraestrutura (KAFI), iha edífisiu Ministériu Finansa, Aitarak-laran, segunda ne’e.

Tuir dadus ne’ebé ekipa téknika halo ona ho kooperasaun hosi Ministériu Administrasaun Estatál (MAE) inklui autoridade lokál no obra públika munisipál, identifika estragu infraestrutura iha lokál hamutuk 101 no kustu estimasaun millaun $245.

Notísia relevante: Kustu estimasaun estragu infraestrutura iha lokál 101 hamutuk millaun $245

Hosi dadus ne’e, projetu reabilitasaun estruturál simples hamutuk 57 ne’ebé klasifisika hosi kustu inferiór millaun $1 no projetu reabilitasaun estruturál komplexa hamutuk 44 ho kustu estimadu boot-liu millaun $1.

“Infraestrutura Komplexa sira ne’e ami sei involve setór privadu sira, hanesan konsultór sira atubele halo estudu kle’an hodi prepara projetu sira ho kualidade liuhosi asisténsia MOP no Ajénsia Dezenvolvimentu Nasionál (AND) hafoin  rekonstrui,” Koordenadór grupu tékniku hatutan.

Nune’e, Responsavél ne’e dehan, semana ida-ne’e ekipa téknika sira komesa dezloka ona ba munisípiu atubele aporfunda dadus preliminár estragu infraestrutura sira.

“Ha’u hanoin estragu kiik ka simples sira ne’e la presiza halo estudu, maibé halo reabilita ka hadia de’it, maibe sira ne’ebé komplexa mak ita presiza duni estudu liuliu barrajen mota, ponte no estrada,” nia subliña.

Governu hakarak halo estudu ba estragu infraestrutura komplexa tanba lakohi obra ida bainhira finaliza iha tinan ida, tinan oin mai fali bainhira akontese inundasaun, mota lori ka sobu fali, tanba ne’e presiza prepara didi’ak atu obra bele dura ho durasaun tempu naruk ho kualidade.

“Rekonstrusaun  ne’e buat boot ida tanba danu maka’as ita presiza rekonstrui, enkuantu reabilitasaun la hanesan ho rekonstrusaun, nune’e  ita presiza tempu naruk, planu di’ak no ita presiza dadus kompletu atu ezekuta projetu ho di’ak,” nia esplika.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here