IGE-empreza nasionál normaliza estrada iha área Bebonuk ne’ebé hetan estagu tanba dezastre naturál iha domingu (04/04). Imajen TATOLI/António Gonçalves

DILI, 29 abríl 2021 (TATOLI)-Ekipa liña ministériál kompostu hosi Ministériu Obra Públika (MOP) no Ministériu Planu no Ordenamentu (MOP), halo ona identifikasaun estragu infraestutura kauza dezastre naturál iha territóriu tomak iha lokál 101 ho kustu estimasaun millaun $245.

Ministru Obra Públika, Salvador Eugênio Soares dos Reis Pires, hateten, ekipa téknika halo identifikasaun ho kooperasaun hosi Ministériu Administrasaun Estatál (MEA) inklui autoridade lokál no Obra Públika munisipál.

“Hau aprezenta antes ne’e, estragu iha lokál 83 ho kustu estimasaun millaun $225, maibé dadus aumenta liuhosi identifikasaun iha munisípiu sira, ba infraestrututra ne’ebé hetan estragu sa’e ba lokál hamutuk 101 ho kustu estimasaun sa’e ba millaun $245, ne’ebé  seidauk konta ho infraestrutura bee estragu eletrisidade,” Ministru Salvador hateten iha Palásiu Governu, kinta ne’e.

Estragu infraestrutura ba verba estrada no ponte hamutuk 101, fahe ba  komponente rua hanesan  infraestrutura simples no komplexu tebes.

Hosi levatamentu dadus, obra ne’ebé hala’o hela, tuir informasaun preliminár indika ba projetu reabilitasaun estruturál simples hamutuk 57 ne’ebé  klasifika hosi kustu inferiór millaun $1 no projetu reabilitasaun estruturál komplexa hamutuk 44 ho kustu estimadu boot-liu milaun $1.

“Klasifikasaun simples tanba estrada no ponte balun rai monu iha sorin de’it ne’ebé bele rekupera ka aterru rai, enkuantu klasifikasaun kompleksu tanba hetan estragu totál ne’ebé ita presiza halo planifikasaun hodi rekupera,” Ministru esplika.

Notísia relevante: Governu klasifika projetu reabilitasaun estruturál impaktu dezastre naturál

Nune’e, Governante ne’e dehan, daudaun fó ona instrusaun ba ekipa téknika sira halo kualifikasaun obra no halo planifikasaun atu mitiga estragu infraestrutura.

Entretantu, Konsellu Administrasaun Fundu Infraestrutura (KAFI) deside rekupera imediata estrada no ponte iha fatin ualu ne’ebé hetan estragu kauza hosi dezastre naturál ne’ebé akontese iha domingu (04/04).

Projetu iha fatin ualu ne’e, hanesan mota iha RTK-diresaun Maloa bá Tuana-laran, estrada Bidau iha Hospitál Nasionál Guido Valadare (HNGV) nia kotuk, estrada ligasaun Tibar bá Ermera, Ponte Loes, Ponte Bekusi-Taibesi no estrada CPLP ba tasi ibun Bebonuk inklui estrada kotu ne’ebé rekupera ona iha Embaixada Japaun oin.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here