Prezidente Institutu Politékniku Betano (IPB), Acácio Cardoso Amaral. Imajen Egas Cristovão

DILI, 03 maiu 2021 (TATOLI) – Institutu Politéknika Kay Rala Xanana Gusmão Betanu (IPB), tinan ne’e, sei inisia ninia konstrusaun edifísiu foun iha rai ektare 10 ho montante orsamentu millaun $18-resin.

Prezidente IPB, Acasio Cardoso Amaral hateten, prosesu konstrusaun edifísiu foun ne’e rasik agora iha ona Ajénsia Dezenvolvimentu Nasionál (ADN ) nia liman atu haree prosesa hodi tama ba konkursu públiku.

Notísia Relevante : MESSK –UNTL ho IPB selebra akordu atu rekruta estudante foun iha 2022

“Orsamentu ba konstrusaun ne’ebé mak tama ona iha BoQ (Bill of Quantity) purvolta millaun $18-resin, maibé la’ós atu ezekuta dala ida, konstrusaun ne’e hanaran multy project ne’ebé na’in ba projetu ne’e mak Ministériu Ensinu Superiór,” Acasio Cardoso Amaral informa ba jornalista sira iha salaun enkontru MESSK Colmera, Dili, segunda ne’e.

Acasio afirma katak tinan ida ne’e IPB hetan desizaun orsamentu hosi komisaun revizaun orsamentu purvolta millaun $1.5 atu inisia konstrusaun. Maibé BoQ ne’ebé prepara ona ninia totál orsamentu purvolta millaun $18-resin.

Nia espera katak konstrusaun bele inisia iha tinan ida ne’e hodi bele rezolve buat ruma, tanba planu konstrusaun ne’e hakarak harii tan sala laboratóriu no dormitóriu ba estudante-sira.

Jornalista   : Tomé Amado

Editór         : Francisco Simões

1 KOMENTÁRIU

  1. tinan 24 ita ukun an hau hanoin ita iha ona esperiensia kona ba planeamento kontrusaun ba edefisiu liu- liu edefisiu sira hanesan IPB sei lases husi nia mehi ou filosofia desemvolvimento nasional,hau nia hanoin ne simples karik IPB ne finalisa hotu ona ,fatin nee sei sai fatin ida furak hanesan nasaun seluk nia politeknik ita hare ba furak los,provas hatudu ona katak politeknik ida iha hera nee ita hare hanesan fali politeknik pasar sengol bidau motaklaran nian ,sabraut no laiha planeamentu tuir mehi ou filosofia hari edefisio ida furak,sekarik ita halo sasan sira nee sai furak bele atrai timor oan no ema rai liur atu bele mai buka matenek iha fatin nee,se karik ema rai liur mak mai duni entaun bele ajuda ita lori promosaun turistika ba sira nian rain no ita sei hetan ema turista barak lori osan mai ita nia rain,tamba ita labele dependensia liu ba buat ida mina rai nee;
    hau tauk los presidente IPB dehan konstrui uluk sorin ho osan 1,5 milhoes ita hare hanesan darurat los no ikus liu sai fali edefisio sabraut hanesan politeknik hera nian.

HAKEREK NO HATÁN

Please enter your comment!
Please enter your name here